వెంకటేష్

ఈ రోజుల్లో నిర్మాతల కుమారులు కూడా హీరోలు అవుతున్నారు. అయితే వారంతా హీరోలు అవ్వడం అనేది పెద్ద పనేం కాదు. వారు సక్సెస్ సాధించడమే వారికి పెద్దపని. నిర్మాతలలో చాలా మందిది నట కుటుంబం అనేది ఉండదు. వారి కుటుంబంలో నటన ఉండదు. అయితే ఇలాంటి అపొహాలన్నింటినీ పటాపంచలు చేస్తూ విక్టరీ వెంకటేష్ ఓన్ టాలెంట్ తో ఫ్యామిలీ, యాక్షన్, క్లాసిక్, ప్రేమ, కామెడీతో పాటు నవ రసాల తన నటనతో ఎందరినో అభిమానులను సంపాదించుకున్నాడు.

వెండి తెరపై వెంకీ కనిపిస్తే చాలు ఆ సినిమా సక్సెస్ అనే పేరు సంపాదించుకున్న అతను 1960 డిసెంబర్ 13వ తేదీన గుంటూరు జిల్లా కారంచేడులో జన్మించాడు.

1990వ దశకంలో వచ్చిన సినిమాలన్నీ విజయ పరంపర కొనసాగడంతో విక్టరీ ఆయన ఇంటి పేరుగా మారిపోయింది. చాలా మంది దగ్గుబాటి వెంకటేష్ అంటే ఎవరో తెలియదు అంటారు. అయితే విక్టరీ వెంకటేష్ అంటే మాత్రం అందరూ టక్కున గుర్తు పట్టేస్తారు.

విక్టరీ వెంకటేష్ చిన్ననాటి నుండే క్రికెట్ అంటే ఎంతో ఇష్టం. ఇండియా మ్యాచులు స్వదేశంలో జరిగినా, విదేశాల్లో జరిగినా అస్సలు మిస్సవ్వడు. ఏకంగా క్రికెట్ స్టేడియంకు వెళ్లి మరీ మ్యాచులను తిలకిస్తాడు. అంతే కాదండోయ్ సెలబ్రిటీ క్రికెట్ లీగ్ లోనూ చాలా ఉత్సాహంగా పాల్గొంటాడు. అంతే కాదండోయ్ క్రికెట్ సంబంధించి అందరికీ ‘వసంతం‘ పంచాడు.

వెంకటేష్ కమ్మ సామాజిక వర్గానికి చెందిన వారు అయినప్పటికీ ఆయన రెడ్డి కుటుంబం నుండి వచ్చిన నీరజారెడ్డిని వివాహం చేసుకున్నారు. ఆయనకే కాదు ఆయన తండ్రి రామానాయుడుకు కుల పట్టింపులు లేవట. మద్రాసులో ఉన్న సమయంలో చిత్తూరు జిల్లా గంగవరపు సుబ్బారెడ్డి కుమార్తె నీరజా రెడ్డిని తొలుత రామానాయుడే ఒకే చేశారట. ఆ తర్వాతే వెంకటేష్ కు ఆమె నచ్చడంతో వారి వివాహాన్ని అంగరంగ వైభవంగా జరిపించారట.

సాధారణంగా వారసత్వం అనేది కేవలం తొలి అవకాశాన్ని ఇస్తుంది. కానీ టాలెంట్ ఉంటేనే ఎవరైనా విజయవంతంగా రాణించగలుగుతారు. తన తండ్రి అండతో ‘కలియుగ పాండవులు‘ పేరిట తొలి సినిమా తీసిన విక్టరీ వెంకటేష్ ఆ తర్వాత వెనుదిరిగి చూడలేదు. క్లాస్, మాస్, కామెడీ, ముఖ్యంగా ఫ్యామిలీ సినిమాలను చేసి అమ్మాయిలలో అద్భుతమైన ఫాలోయింగ్ పెంచుకున్నాడు. ఇప్పటికీ వెంకీ మామ పేరిట వరుస సినిమాలు చేస్తూ తన సత్తా ఏంటో చూపుతున్నాడు.

విక్టరీ వెంకటేష్ 33 ఏళ్ల నుండి తన సినీ ప్రస్థానాన్ని సింపుల్ గా, అందరి కంటే విభిన్నంగా కొనసాగిస్తున్నాడు. వెంకటేష్ ఇలాంటి పుట్టినరోజులు మరెన్నో జరుపుకోవాలని మనసారా కోరుకుంటూ తెలుగు బోల్డ్ స్కై తరపున జన్మదిన శుభాకాంక్షలు తెలియజేస్తున్నాం.