ముప్పుతిప్పలు పెట్టిన చార్మీ

By Staff

| Published: Saturday, December 29, 2007, 23:53 [IST]

దీపం ఉండగానే ఇల్లు చక్కదిద్దుకోవాలనేది సినిమా హీరోయిన్ల పరిస్థితి. హీరోల లాగా వారు ఎక్కువ కాలం పరిశ్రమలో మనలేరు కాబట్టి. ఇంటా బయటా కష్టపడుతారు. సినిమాలో, సినిమా బయటకూడా గ్లామర్స్ గా కనిపిస్తారు. అందుకే చార్మీ తనకు రావాల్సిన ఒక్క రూపాయిని కూడా వదలకుండా ముక్కుపిండి వసూలు చేస్తోంది. ఇపుడు మంత్ర సినిమా నిర్మాతలకు కూడా నిద్రపట్టకుండా చేస్తోంది.

యువ నిర్మాతలు రవి ప్రకాష్, కళ్యాణ్ రామ్ లు మంత్ర సినిమాకు నిర్మాతలుగా వ్యవహరించారు. చార్మీతో ఒప్పందం కుదుర్చుకున్నారు. అయితే సినిమా నిర్మాణం సగం పూర్తి కాగానే వారు ఆర్థిక ఇబ్బందులలో పడ్డారు. ఎట్టకేలకు సినిమాను పూర్తి చేసి విడుదల చేశారు. ఇక్కడే చార్మీ ట్విస్ట్ ఇచ్చింది. సినిమా విడుదలకు ముందే తనతో కుదుర్చుకున్న ఒప్పందం ప్రకారం డబ్బు చెల్లించిన తరువాతే సినిమా విడుదల చేయాలని డిమాండ్ చేసింది. రూ.5 లక్షల బాకీని చెల్లించాల్సిందేనని పట్టుపట్టింది. దీనికి బెదిరిన నిర్మాతలు చార్మీ మేనేజర్ శ్రీనివాస్ ను కలుసుకున్నారు. సినిమా విడుదల అయిన తరువాత వచ్చిన డబ్బుతో మిగతా బాకీ తీరుస్తామన్నారు. దీనికి అంగీకరించకుండా మంత్ర సినిమా మలయాళ హక్కులు ఇస్తే ఒప్పుకుంటామని శ్రీనివాస్ బదులిచ్చారు. ఎట్టకేలకు సినిమా విడుదల అయింది. సినిమా ఘనవిజయం సాధించడంతో నిర్మాతలు ఊపిరి పీల్చుకున్నారు. సినిమా ప్రమోషన్ టూర్, సక్సెస్ మీట్ కోసం నిర్మాతలు మరోమారు చార్మీ వద్దకు వెళ్లారు. మరోమారు మరో షరతు విధించింది. అదేమంటే తాను పాల్గొనే ప్రెస్ మీట్ కు హీరో శివాజీని కానీ మరొకరిని కానీ పిలవవద్దని కరాఖండిగా చెప్పింది. అంతేనా మంత్ర సినిమా తమిళ హక్కులను అమ్మారని తెలిసి ఆగ్రహం చెందింది. తాను తీసుకునేదాన్ని కదా అని క్లాస్ పీకింది.