హోమ్

న్యూస్

హైదరాబాద్: బుల్లితెర యాంకర్, నటి ఝాన్సీ నిర్మాతగా మారి ఓ సినిమాను నిర్మించిన సంగతి తెలసిందే. షీతల్ మోర్జారియా దర్శకత్వంలో ఎ బనాయేంగే ఫిల్మ్ ప్రొడక్షన్ పతాకంపై రేఖ పప్పుతో కలిసి ఆంగ్లంలో 'ఆల్ ఐ వాంట్ ఈజ్ ఎవ్రిథింగ్' చిత్రాన్ని నిర్మించారు. తాజాగా ఈచిత్రం విడుదల తేదీ ఖరారైంది.

కేవలం 62 నిమిషాల నిడివిగల ఈచిత్రాన్ని మార్చి 8న అంతర్జాతీయ మహిళల దినోత్సవం సందర్భంగా విడుదల చేసేందుకు సన్నాహాలు చేస్తున్నారు. స్త్రీ స్నేహం నేపథ్యంలో రూపొందించారు. ఈ సినిమాకు ఛాయా గ్రాహకుడు, కూర్పరి మినహా మిగిలిన టీమ్ అంతా మహిళలే కావడం విశేషం. సాగరి వెంకట, సంపద హర్కారా, అయాంతా మిఛెల్ ముఖ్యతారలుగా నటించారు.

ఈ సినిమా గురించి ఝాన్సీ మాట్లాడుతూ 'ఇంత వరకూ అబ్బాయిల ఫ్రెండ్షిప్ తో చాలా సినిమాలు వచ్చాయి కానీ, అమ్మాయిల ఫ్రెండ్షిప్ గురించి ఎవరూ డీల్ చేయలేదు. ఈ సినిమాలో మూడు పాత్రలే ఉంటాయి. ముగ్గురు అమ్మాయిలు, వారి స్నేహం, తమ సమస్యల పరిష్కారం నేపథ్యంలో చాలా బోల్డ్ నేచర్‌లో ఈచిత్రం చేసాం. దేశ వ్యాప్తంగా విడుదల చేసే ఆలోచనలో ఉన్నాం' అని తెలిపారు. ఈ చిత్రానికి కెమెరా: శ్యామ్ ప్రసాద్, లైన్ ప్రొడ్యూసర్: శోభన ఎన్. రావు. ఇప్పటికే ఈచిత్రం గోవాలో జరిగిన సౌత్ ఏషియల్ ఫిల్మ్ ఫెస్టివల్ లో ప్రదర్శితమై విమర్శకుల ప్రశంసలు అందుకుంది.