కోర్టు మెట్లు ఎక్కనున్న సినీ నటి త్రిష.. ఆ వ్యవహారం మళ్లీ మొదటికి..

త్రిష తప్పుడు లెక్కలు..

2010-11 సంవత్సరానికి గానూ తన ఆదాయాన్ని త్రిష రూ.89 లక్షలుగా చూపించింది. అయితే ఆమె అంత తక్కువ మొత్తాన్ని ఆదాయంగా చూపించడంతో అనుమానం వచ్చిన ఐటీశాఖ దాడులు నిర్వహించింది. ఆ తర్వాత ఏడాది సినిమాలకు గానూ అడ్వాన్స్ మొత్తాన్ని త్రిష ఆదాయంలో చూపలేదని అధికారులు ధ్రువీకరించారు.

1.15 కోట్ల జరిమానా

దాడుల అనంతరం ఆ ఏడాదికి త్రిష మొత్తం ఆదాయం 3.5 కోట్ల రూపాయలుగా అధికారులు తేల్చారు. అందుకు తగ్గ పన్నును వసూలు చేయడంతో పాటు.. తప్పుడు లెక్కలు చూపినందుకు గానూ రూ.1.15 కోట్లను జరిమానాగా విధించారు. ఆదాయం పన్ను శాఖను తప్పుదోవ పట్టించారని, ఐటీశాఖ నిబంధనలను ఉల్లంఘించారని పిటిషన్ దాఖలు చేశారు.

ఐటీశాఖ కేసుపై పిటిషన్

ఐటీశాఖ తీరును నిరసిస్తూ త్రిష ఐటీ శాఖ ట్రిబ్యూనల్ ను ఆశ్రయించింది. తను పన్ను చెల్లించాను కాబట్టి, ఫైన్‌ను చెల్లించాల్సిన అవసరం లేదని ఆమె తరఫు న్యాయవాది వాదించారు. ట్రిబ్యునల్ ఆమెకు అనుకూలంగా నిలిచింది. జరిమానా చెల్లించాల్సిన అవసరం లేదని తీర్పునిచ్చింది. అయితే ట్రిబ్యునల్ తీర్పుతో ఐటీ శాఖ వెనక్కు తగ్గలేదు. త్రిష వ్యవహారంపై మళ్లీ మద్రాస్ హై కోర్టులో కేసు వేసింది.

ట్రిబ్యునల్ తీర్పుపై ఐటీశాఖ

త్రిషకు విధించిన జరిమానా చెల్లించక్కర్లేదంటూ ట్రిబ్యునల్ కోర్టు ఇచ్చిన ఉత్తర్వులపై ఐటీ శాఖ గురువారం మద్రాసు హైకోర్టులో అప్పీలు చేసింది. ఈ పిటిషన్‌ను విచారణకు స్వీకరించిన ప్రధాన న్యాయమూర్తి జస్టిస్‌ ఇందిరా బెనర్జీ, న్యాయమూర్తి సుందర్‌లతో కూడిన ధర్మాసనం కేసు విచారణను వాయిదా వేసింది.