రణ్‌బీర్, ఆలియా భట్ పెళ్లి ఫొటో వైరల్.. సీక్రెట్‌గా పెళ్లి చేసుకున్నారా? హాట్ టాపిక్

గత కొంత కాలంగా ప్రేమాయణం.. మీడియాలో హాట్ టాపిక్

బాలీవుడ్ స్టార్ హీరోహీరోయిన్లు రణ్‌బీర్ కపూర్, ఆలియా భట్ ప్రేమ మత్తులో ముగి తేలుతున్నారని గత కొంత కాలంగా వార్తలు షికారు చేస్తున్న సంగతి తెలిసిందే. ఇటీవలే ఈ ఇద్దరూ కలిసి విదేశీ ప్రయాణం చేయడం, పలు కార్యక్రమాల్లో మెరుస్తుండటంతో ఈ వార్తలకు మరింత బలం చేకూరింది. అతి త్వరలో వీరి పెళ్లి జరగనుందని ఫిక్స్ అయ్యారంతా.

సీక్రెట్‌గా పెళ్లి.. నెట్టింట ఫొటో వైరల్

సరిగ్గా ఇలాంటి తరుణంలో రణ్‌బీర్ కపూర్, ఆలియా భట్ పెళ్లి ఫొటో ఒకటి నెట్టింట వైరల్ అవుతోంది. ఇందులో పెళ్లి కూతురిలా తయారై రణ్‌బీర్ కపూర్ మెడలో దండ వేస్తున్నట్లుగా కనిపిస్తోంది ఆలియా భట్. దీంతో అంతా ఒక్కసారిగా షాక్ అయ్యారు. ఈ ఇద్దరూ సీక్రెట్ గా పెళ్లి చేసుకున్నారేమో అని భ్రమ పడ్డారు. కానీ అసలు విషయం తెలిసి మరింత ఆశ్చర్యపోయారు.

ఇదీ అసలు విషయం

నిజానికి ఇది రియల్ ఫొటో కాదు. మోహే కలెక్షన్స్ అనే బ్రాండ్ రూపొందించిన కమర్షియల్ యాడ్ లో ఆలియా నటించింది. పెళ్లి కూతురిలా తయారై వరుడి మెడలో దండ వేస్తున్నట్లుగా ఆ యాడ్‌ షూట్ చేశారు. దీంతో ఈ యాడ్ లోని ఫొటో తీసుకొని, అందులోని వరుడికి బదులుగా రణ్‌బీర్ కపూర్ యాడ్ చేశాడు ఓ నెటిజన్. దీంతో ఈ ఇద్దరికీ నిజంగా పెళ్ళైపోయిందేమో అనుకొని నెటిజన్లు ఈ ఫోటోని వైరల్ చేసేశారు.

నిశ్చితార్థం ఏర్పాట్లు.. 2020లో పెళ్లి

రణ్‌బీర్ కపూర్, ఆలియా భట్ వివాహం 2019 చివర్లోనే జరగాల్సి ఉండగా, రణ్‌బీర్ తండ్రి రిషీ కపూర్ అనారోగ్యం కారణంగా వాయిదాపడిందని తెలుస్తోంది. ప్రస్తుతం రిషీ కపూర్ కోలుకోవడంతో వెంటనే నిశ్ఛితార్థం జరగాలని ఇరు కుటుంబాలూ అనుకుంటున్నాయట. అందుకోసం ఏర్పాట్లు కూడా చేస్తున్నారని తెలిసింది. 2020లో వీరి పెళ్లి జరగనుందని సమాచారం.

RRR లో ఆలియా

బాలీవుడ్ లో స్టార్ హీరోయిన్ గా కెరీర్ కొనసాగిస్తున్న ఆలియా భట్ RRR సినిమాతో టాలీవడ్ తెరపై కాలుమోపుతోంది. రాజమౌళి దర్శకత్వంలో తెరకెక్కుతున్న ఈ చిత్రంలో రామ్ చరణ్ సరసన ఆలియా భట్ నటిస్తోంది. 2020 జులై 30 న ఈ సినిమా విడుదల కానుంది.