నిజమైన హీరో నువ్వే: అభినందన్‌కు స్వాగతం చెబుతూ సినీ స్టార్ల ట్వీట్స్

పాకిస్థాన్ సైన్యానికి చిక్కిన ఇండియన్ ఎయిర్ ఫోర్స్ వింగ్ కమాండర్ అభినందన్ వర్దమాన్ శుక్రవారం సాయంత్రం తిరిగి ఇండియా చేరుకున్నారు. అభినందన్ క్షేమంగా తిరిగి రావడంతో భారతీయుల ముఖాల్లో సంతోషం వెల్లువిరిసింది.

ఫిబ్రవరి 14న జరిగిన పుల్వామా ఉగ్రదాడికి ప్రతీకారంగా ఫిబ్రవరి 26న ఇండియన్ ఎయిర్ ఫోర్స్ పాక్ ఆక్రమిత కాశ్మీర్‌లోని బాలాకోట్ ప్రాంతంలో ఉగ్రవాద శిబిరాలపై బాంబుల వర్షం కురిపించింది. ఈ ఆపరేషన్ తర్వాత పాకిస్థాన్ యుద్ధవిమానాలు భారత గగనతలంలోకి దూసుకురావడంతో వాటిని తరిమికొట్టడానికి మిగ్-21 బైనస్ యుద్ధ విమానంలో బయల్దేరిన అభినందన్... ఈ క్రమంలో తన విమానం పాక్ భూభాగంలో కూలిపోవడంతో అక్కడ సైన్యానికి చిక్కాడు. అంతర్జాతీయంగా ఒత్తిడి పెరగడంతో పాకిస్థాన్ ప్రభుత్వం అభినందన్ వర్ధమాన్‌ను క్షేమంగా వదిలిపెట్టింది.

పాక్ సైనికులకు చిక్కగానే తన వద్ద ఉన్న రహస్య పత్రాలు పాక్ ఆర్మీకి చిక్కకుండా వాటిని మింగివేసిన అభినందన్‌పై ప్రశంసల వర్షం కురుస్తోంది. పాక్ సైనికాధికారులు భారత సైన్యానికి సంబంధించిన రహస్యాలు రాబట్టే ప్రయత్నం చేసినా అభినందన్ ఆ విషయాలేవీ బయట పెట్టకుండా దేశ ప్రజల దృష్టిలో హీరో అయ్యాడు.

అభినందన్‌కు వెల్ కం చెబుతూ దేశ ప్రజలంతా సంబరాల్లో మునిగిపోయారు. పలువురు బాలీవుడ్ తారలు సైతం ఈ ఎయిర్ ఫోర్స్ హీరోకు వెల్ కం చెబుతూ ట్వీట్ల వర్షం కురిపించారు.