ఈ నిజాన్ని అంగీకరించడం కష్టంగా ఉంది..: గుండెను పిండేసిన ఇర్ఫాన్ ఖాన్

'న్యూరోఎండోక్రైన్ క్యాన్సర్' :

చర్మం లోపలి కణజాలంతోపాటు అంతర్గత శరీర భాగాలకు కూడా విస్తరించే 'న్యూరోఎండోక్రైన్ క్యాన్సర్' అనే అరుదైన వ్యాధితో తాను బాధపడుతున్నట్టు వెల్లడించారు. మెరుగైన చికిత్స కోసం విదేశాలకు వెళ్లినట్టు చెప్పారు.

ధైర్యాన్నిస్తున్నారు..:

శరీరంలోని ఏ భాగానికైనా పాకే ఈ వ్యాధిని నియంత్రించడం చాలా కష్టంతో కూడుకున్నదని.. ఈ కష్టకాలంలో దాన్ని ఎదుర్కోవడానికి కావాల్సిన ధైర్యాన్ని, మద్దతును బంధువులు, స్నేహితులు, అభిమానుల నుంచి పొందుతున్నానని పేర్కొన్నారు.

గుండెను పిండేసే మాట..:

ప్రముఖ అమెరికన్ రచయిత మార్గరేట్ మిచెల్ గాన్ 'విత్ ది వైండ్' పుస్తకంలోని వాక్యాలను ఉటంకిస్తూ.. ఇర్ఫాన్ తన ప్రకటన విడుదల చేయడం గమనార్హం. 'మనం ఆశించినది మనకు ఇవ్వడానికి జీవితం ఎటువంటి బాధ్యత వహించదు' అన్న ఆ మాటలు గుండెను తాకేలా ఉన్నాయి.

నిజాన్ని అంగీకరించడం కష్టంగా ఉంది

తనకు న్యూరోఎండోక్రైన్ ట్యూమర్ ఉందని తెలిసినప్పటి నుంచి.. నిజాన్ని అంగీకరించడానికి మనసుకు చాలా కష్టంగా ఉన్నట్టు ఇర్ఫాన్ ఆవేదన వ్యక్తం చేశారు. అందరి నుంచి వస్తున్న మద్దతు అలాగే కొనసాగాలని, మీ నుంచి మరిన్ని విషెస్ కోరుకుంటున్నానని ఇర్ఫాన్ అభిమానులకు వెల్లడించారు.

ఫైనల్ వర్డ్:

తన ఆరోగ్యం గురించి చాలానే ఊహాగానాలు బయలుదేరాయని, అలాంటివేవి ఊహించుకోకుండా ఉన్న వారికి కృతజ్ఞతలు అని ఇర్ఫాన్ అన్నారు. అలాగే న్యూరో అంటే కేవలం మెదడుకు సంబంధించినది మాత్రమే కాదని చెప్పారు. నా మాటల కోసం ఎదురుచూస్తున్నవారికి మరిన్ని విషయాలు చెప్పడానికి త్వరలోనే నేను తిరిగి వస్తున్నానని ఆశిస్తున్నా.. అంటూ ఇర్ఫాన్ ముగించారు.

ఊహాగానాలకు చెక్..:

ఇర్ఫాన్ ప్రకటనతో ఆయన ఆరోగ్యంపై ఊహాగానాలకు తెరపడినట్టయింది. అదే సమయంలో ఆయన ఆరోగ్యం కోసం దేశవ్యాప్తంగా ఎంతోమంది అభిమానులు ఆందోళన చెందుతున్నారు. ఆయన త్వరగా కోలుకోవాలని, భవిష్యత్తులో మరిన్ని మంచి సినిమాలు చేయాలని ఆశిస్తున్నారు.