HBD Salmankhan నిత్య బ్రహ్మాచారి.. వివాదాలు ఓ వైపు.. రికార్డులు మరో వైపు

సల్మాన్ ఖాన్ అంటే పెళ్లి..

సల్మాన్ ఖాన్ అంటే అందరికీ మొదట గుర్తొచ్చేది పెళ్లి. పెళ్లి కాని ప్రసాదులా జీవితాన్ని అలా గడిపేస్తున్నాడు. సల్మాన్ ఇలా ఒంటరిగా గడిపేయడానికి కూడా కారణాలున్నాయి. గతంలో సల్మాన్ భగ్నప్రేమికుడు. ఐశ్వర్యా రాయ్, కత్రినా కైఫ్ వంటి వారితో పీకల్లోతు ప్రేమలో మునిగాడని కానీ అవేవీ పెళ్లి పీటల వరకు రాలేదు. ప్రస్తుతం లూలియా వంతూర్‌‌తో సల్మాన్ ప్రేమలో ఉన్నాడని తెలిసిందే.

వివాదాలతో వైరల్..

సల్మాన్ ఖాన్ అంటే పెళ్లి తరువాత వివాదాల టాపిక్‌తోనే ఎక్కువగా ఫేమస్ అయ్యాడు. కృష్ణజింకను వేటాడిన కేస్, డ్రంక్ అండ్ డ్రైవ్ కేస్‌లతో సల్మాన్ ఖాన్ ఇమేజ్ దారుణంగా పడిపోయింది. ఇప్పటికీ ఆ కేసుల వ్యవహారం ఓ పట్టాన తేలలేదు. ఈ ఘటనలన్నింటి తరువాతే సల్మాన్ ఖాన్ బీయింగ్ హ్యూమన్ అంటూ ఓ సంస్థను ప్రారంభించి సేవా కార్యక్రమాలు చేపట్టాడు.

బాక్సాఫీస్‌పై దాడి..

ఒకప్పుడు సల్మాన్ ఫ్యామిలీ ఆడియెన్స్, లవర్ బాయ్ క్యారెక్టర్స్ వేశాడు. కానీ రాను రాను కమర్షియల్ సినిమాలకు బ్రాండ్ అంబాసిడర్‌గా మారిపోయాడు. బాలీవుడ్ యాక్షన్ సినిమాలకు సల్మాన్ ఖాన్ కేరాఫ్ అడ్రస్‌గా మారాడు. ఇప్పుడు సల్మాన్ ఖాన్ సినిమా అంటే మినిమం వంద కోట్లు కలెక్ట్ చేస్తుందనే టాక్ అక్కడ ఉంది.

వరుసగా సూపర్ హిట్లు..

సల్మాన్ ఖాన్ వాంటెడ్ చిత్రం నుంచి మొన్నటి వరకు విడుదలైన దబాంగ్ 3 వరకు అన్నీ కూడా మినిమం వంద కోట్లు కలెక్ట్ చేసి సూపర్ హిట్లుగా నిలిచాయి. అందులో టైగర్ జిందా హై, భజరంగీ భాయీజాన్, సుల్తాన్,దబాంగ్, ఏక్తా టైగర్ వంటి బ్లాక్ బస్టర్లు ఎన్నో ఉన్నాయి. వరుసగా తొమ్మిది పదిచిత్రాలు వంద కోట్ల క్లబ్, రెండు వందల కోట్ల క్లబ్‌లోకి చేరడం ఇప్పటికీ ఎప్పటికీ ఓ రికార్డ్. డిజాస్టర్లైన ట్యూబ్ లైట్ వంటి చిత్రం కూడా 100 కోట్లకుపైగా కలెక్ట్ చేయడం మరో విశేషం.