రేప్‌లు, లైంగిక దాడులు ట్రాష్.. అంతా ఇష్ట ప్రకారమే.. మీటూపై బాలీవుడ్ నటి సెటైర్లు

అంతా ఇష్ట ప్రకారమే

సినీ పరిశ్రమలో రేప్‌, లైంగిక దాడులు, లైంగిక వేధింపులు అనేవి ఉండవు. ఒకరికొకరు ఇష్టపడటం ద్వారానే లైంగిక సంబంధాలు కొనసాగుతుంటాయి. ఒకవేళ నిజంగా జరిగి ఉంటే అప్పుడే బయటపెట్టాలి. ఎప్పుడో జరిగిందని వార్తల్లోకి ఎక్కితే ఎవరూ పట్టించుకోరు అని శిల్పా షిండే అన్నారు.

సినీ ఇండస్ట్రీనే టార్గెట్

గ్లామర్‌తో కూడిన సినీ పరిశ్రమలో మంచి లేదని, చెడు లేదు అని చెప్పడం కష్టం. కేవలం సినీ పరిశ్రమలోనే కాదు. అన్ని రంగాల్లో ఈ సమస్య ఉంది. సినిమా పరిశ్రమనే టార్గెట్ ఎందుకు చేస్తున్నారో అర్ధం కావడం లేదు. సినిమా పరిశ్రమలో అందరూ చెడ్డవాళ్లే లేరు. మంచి వాళ్లు కూడా ఉన్నారు. వారి పేరుని ఎందుకు పాడుచేస్తున్నారో అని శిల్పా షిండే అన్నారు.

ఇక్కడ ఇచ్చి, పుచ్చుకోవడమే

లైంగిక వేధింపులనేవి ఉండవు. ఒకరి కోరికకు మరొకరు ఎలా స్పందిస్తున్నారనే విషయాన్ని బట్టే ఏదైనా ఉంటుంది. ఇక్కడ అంతా ఇచ్చి పుచ్చుకోవడమే. ఏదీ బలవంతంగా జరుగదు. ఇప్పటి వరకు ఆరోపణలు వస్తున్న వివాదాల్లో పరస్పర అంగీకారంతోనే జరిగాయి.

మీడియాలోకి డర్టీ విషయాలు

సినీ పరిశ్రమలో చోటుచేసుకొంటున్న విషయాలు భారతీయ మహిళలకు, పురుషులకు కనువిప్పుగా మారుతున్నాయి. పలు పరిశ్రమల్లోని డర్టీ విషయాలు మీడియాల్లోకి ఎక్కుతున్నాయి. లైంగిక వేధింపులు, క్యాస్టింగ్ కౌచ్ లాంటి అంశాలు ఏ ఒక్క రంగానికో పరిమితం కాలేదు.

బాలీవుడ్‌ను కుదిపేస్తున్న మీ టూ

ఇటీవల కాలంలో లైంగిక వేధింపుల ఆరోపణలు బాలీవుడ్‌ను కుదిపేస్తున్నాయి. నానా పాటేకర్‌పై తనుశ్రీ దత్తా ఆరోపణలు సెన్సేషనల్‌గా మారాయి. చేతన్ భగత్, రజత్ కపూర్, కైలాష్ ఖేర్, వికాస్ బెహల్, సాజిద్ ఖాన్ లాంటి ప్రముఖులు లైంగిక దాడుల ఆరోపణలు ఎదుర్కొంటున్న సంగతి తెలిసిందే.