సుశాంత్‌కు చివరి వీడ్కోలు చెప్పిన ఫ్యామిలీ.. సంచలన నిర్ణయం ప్రకటిస్తూ లేఖ

ఎంతో గర్వకారణం..

సుశాంత్ ఫ్యామిలీ లేఖ సారాశం.. ‘సుశాంత్ ఆత్మ ఎంతో స్వేచ్చగా తిరిగేది. అనర్గళంగా మాట్లాడేవాడు. నమ్మశక్యం గాని ప్రతిభ అతని సొంతం. ప్రతీ ఒక్క విషయం పట్ల ఎంతో ఆసక్తిని కనబర్చేవాడు. నిర్విరామంగా కలలు కంటూ ఉండేవాడు. ఓ సింహం మాదిరి తన కలలను వెంటాడే వాడు. ఎంతో చక్కగా నవ్వుతూ ఉండేవాడు. మా కుటుంబానికి సుశాంత్ గర్వకారణం. ఎంతో ఇష్టమైన చుక్కలనే చూసే టెలిస్కోప్ అతనికి వెలకట్టలేని బహుమతి.

ఇక చూడలేం..

అతని నవ్వులను తిరిగి చూడలేమనే సత్యాన్ని మేము అంగీకరించలేకపోతున్నాము. మెరిసే అతని కళ్లను ఇక మేము చూడలేం. సైన్స్ గురించి చెప్పే అతని మాటలను మేము ఎప్పటికి వినలేం. అతని మరణం మాకు శాశ్వత శూన్యాన్ని మిగిల్చింది. అది ఎప్పటికీ భర్తీ చేయలేనిది.

యంగ్ టాలెంట్ కోసం ఫౌండేషన్

అతను తన అభిమానులను సంతోషపరిచేందుకు ప్రయత్నించేవాడు. సుశాంత్‌పై ఎంతో ప్రేమను కురిపించిన మీ అందరికీ ధన్యవాదాలు. సుశాంత్‌ గౌరవార్థం, అతని లెగసీని ముందుకు తీసుకెళ్లేందుకు గానూ.. నిమా, సైన్స్, స్పోర్ట్స్ ఇలా అన్ని విభాగాల్లో యంగ్ టాలెంట్‌ను ప్రోత్సహించేందుకు సుశాంత్ సింగ్ రాజ్‌పుత్ ఫౌండేషన్‌ను స్థాపించాలని మా కుటుంబ సభ్యులందరం నిర్ణయించుకున్నాం.

సుశాంత్ మెమోరియల్..

రాజీవ్ నగర్, పాట్నాలోని సుశాంత్ నివసించిన ఇంటిని ఇకపై మెమోరియల్‌గా మార్చబోతోన్నాం. సుశాంత్ వస్తువులను అందులో ఉంచుతాం. అందులో భాగంగా అతడిని ఆరాధించే వారికోసం, అభిమానుల కోసం కొన్ని వేల పుస్తకాలు, అతని టెలిస్కోప్, ఫ్లైట్ స్టిమ్యులేటర్ వంటి వాటిని భద్రపరుస్తాం.

సుశాంత్ జ్ఞాపకార్థం..

ఇక ఈ క్షణం నుంచి అతని ఫేస్ బుక్, ఇన్‌స్టాగ్రామ్, ట్విట్టర్ అకౌంట్‌లను అతని జ్ఞాపకార్థం మేమే హ్యాండిల్ చేస్తాం. సుశాంత్ జ్ఞాపకాలు నిత్యం ఉండేలా వాటిని మేము నిర్వహిస్తాము. మరొక్క సారి మీ అందరికీ ధన్యవాదాలు' అని సుశాంత్ ఫ్యామిలీ అందర్నీ కంటతడి పెట్టించింది.