Dacoit Overseas Box Office: డెకాయిట్ ఓవర్సీస్ బాక్సాఫీస్ కలెక్షన్లు.. అడివి శేష్ మూవీకి ఎన్ని కోట్లంటే?

తెలుగులో యంగ్ హీరో అడివి శేష్ నటించిన డెకాయిట్ చిత్రం బాక్సాఫీస్ వద్ద కలెక్షన్ల సందడి చేస్తున్నది. టెక్నికల్ వాల్యూస్‌తో రూపొందిన ఈ సినిమా తొలి ఆట తర్వాత వచ్చిన మిక్స్‌డ్ టాక్‌ను ఎదురించి నిలకడగా వసూళ్లను సాధిస్తున్నదని చిత్ర యూనిట్ అధికారికంగా గత రెండు రోజుల వసూళ్లను వెల్లడించింది. షానీల్ దేవ్ దర్శకత్వంలో తెరకెక్కిన ఈ చిత్రంలో అందాల భామ మృణాల్ థాకూర్, బాలీవుడ్ దర్శకుడు, నటుడు అనురాగ్ కశ్యప్, ప్రకాశ్ రాజ్ తదితరులు నటించిన ఈ చిత్రం తొలి వారాంతంలో పాజిటివ్ రెస్పాన్స్ సొంతం చేసుకొంటున్నది. ఈ సినిమా నార్త్ అమెరికాతోపాటు ఇతర దేశాల్లో సాధించిన కలెక్షన్ల వివరాల్లోకి వెళితే..

లవ్, రొమాంటిక్, యాక్షన్ చిత్రంగా రూపొందిన డెకాయిట్ చిత్రాన్ని ఓవర్సీస్ రైట్స్‌ను మోక్ష మూవీస్ డిస్ట్రిబ్యూటర్ దక్కించుకొన్నది. ఈ సినిమా నార్త్ అమెరికా, ఇతర దేశాల థియేట్రికల్ రైట్స్‌ను సుమారుగా 6 కోట్ల రూపాయల మేర బిజినెస్ జరిగిందని ట్రేడ్ వర్గాల్లో టాక్. అయితే ఈ సినిమాపై అంచనాలు, క్రేజ్ ఆడియెన్స్‌లో ఉండటం వల్ల భారీగా బిజినెస్ జరిగింది. ఈ సినిమా సుమారుగా 7 కోట్ల రూపాయల షేర్.. 14 కోట్ల రూపాయల గ్రాస్ కలెక్షన్ల టార్గెట్‌తో బాక్సాఫీస్ జర్నీని మొదలుపెట్టింది.

డెకాయిట్ సినిమా ప్రమోషన్స్‌కు మంచి రెస్పాన్స్ రావడం, అలాగే మృణాల్, శేష్ కాంబినేషన్‌కు ప్రేక్షకుల నుంచి పాజిటివ్ సిగ్నల్స్ రావడంతో ఈ సినిమా అడ్వాన్స్ బుకింగ్ కూడా సానుకూలంగా ప్రారంభమైంది. నార్త్ అమెరికా అంటే కెనడా, యూఎస్‌లో తొలి రోజు గ్రాండ్‌గా బాక్సాఫీస్ జర్నీని మొదలుపెట్టింది. మొదటి రోజు అమెరికాలో 575K డాలర్లు వసూలు చేసింది. రెండో రోజు ఈ సినిమా 760K డాలర్లను రాబట్టింది అని మోక్ష మూవీస్ అధికారికంగా ప్రకటించింది.

ఇక ఓవర్సీస్ కలెక్షన్ల విషయానికి వస్తే.. ఈ చిత్రం 1 మిలియన్ డాలర్ల క్లబ్‌లో చేరింది అని మోక్ష మూవీస్ ప్రకటించింది. నార్త్ అమెరికా, ఇతర దేశాల్లోని ప్రేక్షకుల ఆదరణ, ప్రేమ వల్లే ఇది సాధ్యమైంది. ఈ సినిమాను ఆడియెన్స్ బ్లాక్ బస్టర్ అని తేల్చేశారు అని తమ ఆనందాన్ని వ్యక్తం చేశారు. భారతీయ కరెన్సీలో ఈ సినిమా సుమారుగా 9.30 కోట్ల రూపాయలు వసూలు చేసింది అని తెలిపింది. తొలివారంలో ఈ సినిమా బ్రేక్ ఈవెన్ సాధించడం ఖాయంగా కనిపిస్తున్నది.

డెకాయిట్ సినిమా వరల్డ్ వైడ్ కలెక్షన్ల వివరాల్లోకి వెళితే.. ఈ చిత్రం రెండో రోజు 7 కోట్ల రూపాయలు వసూలు చేసింది. ఈ సినిమా ఇండియాలో 16 కోట్ల రూపాయల నెట్ వసూళ్లను రాబట్టింది. ఓవర్సీస్ మార్కెట్‌ కలెక్షన్లు 9 కోట్లకుపైగా కలెక్షన్లను కలిపితే ఈ చిత్రం 25 కోట్లకుపైగా వసూళ్లను నమోదు చేసిందని ట్రేడ్ వర్గాలు వెల్లడించాయి.

ప్రముఖ సినీ నిర్మాణ సంస్థ అన్నపూర్ణ స్టూడియోస్ బ్యానర్ సమర్ఫణలో సుప్రియా యార్లగడ్డ డెకాయిట్ సినిమాను నిర్మించారు. ఎస్ఎస్ క్రియేషన్స్, సునీల్ నారంగ్ ప్రొడక్షన్స్ తెరకెక్కించిన ఈ చిత్రానికి షానీల్ డియో దర్శకత్వం వహించారు. ఈ చిత్రంలో బాలీవుడ్ దర్శకుడు, సునీల్, అతుల్ కులకర్ణి, జ్యాన్ మేరీ ఖాన్, కామాక్షి భాస్కర్ల తదితరులు నటించారు. ఈ మూవీ సాంకేతిక విభాగాల పనితీరు విషయానికి వస్తే.. ధనుష్ భాస్కర్ సినిమాటోగ్రఫిని, భీమ్స్ సిసిరోలియో మ్యూజిక్, కోదాటి పవన్ కల్యాణ్ ఎడిటింగ్, బ్యాక్ గ్రౌండ్ మ్యూజిక్ గ్యానీ బాధ్యతలను నిర్వర్తించారు. ఏప్రిల్ 10వ తేదీన రిలీజ్ అయిన విషయం తెలిసిందే.