Ghilli Collectionsబాక్సాఫీస్ వద్ద గిల్లీ శివతాండవం..సౌత్ ఇండస్ట్రీలో విజయ్ రికార్డ్ బ్రేక్ కలెక్షన్లు..

తెలుగు సినిమా పరిశ్రమలో సంచలన విజయం సాధించడమే కాకుండా మహేష్ బాబుకు స్టార్ డమ్‌ను తెచ్చిపెట్టిన చిత్రం ఒక్కడు. గుణశేఖర్ దర్శకత్వంలో రూపొందిన ఈ సినిమాను తమిళంలో ఇళయదళపలి విజయ్ హీరోగా ధరణి దర్శకత్వంలో గిల్లీగా తెరకెక్కింది. ఈ చిత్రం కూడా తమిళంలో బ్లాక్‌బస్టర్ విజయాన్ని అందుకొన్నది. అయితే విజయ్ రాజకీయ ప్రవేశం చేసిన నేపథ్యంలో ఈ సినిమాను తమిళనాడు, ఓవర్సీస్‌లో రీ రిలీజ్ చేయగా బాక్సాఫీస్ వద్ద సంచలన రీతిలో వసూళ్లను రాబడుతున్నది. ఈ సినిమా రీరిలీజ్ కలెక్షన్ల వివరాల్లోకి వెళితే..

ప్రముఖ నిర్మాత ఏఎం రత్నం నిర్మాణంలో గిల్లీ సినిమాను సుమారుగా 8 కోట్ల రూపాయలతో నిర్మించారు. అయితే ఈ సినిమా తెలుగులో మాదిరిగానే రికార్డు కలెక్షన్లను బాక్సాఫీస్ వద్ద రాబట్టింది. ఎన్నో వారాలు విజయవంతంగా ఆడిన ఈ చిత్రం థియేట్రికల్ రన్‌ పూర్తయిన తర్వాత లెక్కిస్తే.. 50 కోట్ల షేర్ సాధించింది.

అలాంటి బాక్సాఫీస్ చరిత్ర ఉన్న విజయ్ సినిమాను తాజాగా మరోసారి విడుదల చేశారు. ఈ సినిమాకు అభిమానుల నుంచి భారీ స్పందన రావడంతో భారీ అడ్వాన్స్ బుకింగ్ నమోదైంది. దక్షిణాదిలో రీరిలీజ్ అయిన సినిమాల్లో గిల్లీ మూవీ చరిత్ర సృష్టించింది. అత్యధిక వసూళ్లు సాధించిన తొలి చిత్రంగా రికార్డు క్రియేట్ చేసింది.

విజయ్ నటించిన ఈ చిత్రం తమిళనాడులోనే కాకుండా కేరళ, కర్ణాటకలో రికార్డు వసూళ్లను నమోదు చేసింది. అయితే ఈ సినిమా టికెట్ల ధరను భారీగా తగ్గించి అమ్మకాలు చేపట్టారు. ఒకవేళ సాధారణ ధరకు టికెట్స్ అమ్మితే రికార్డులు తిరిగరాసే అవకాశం ఉండేదని ట్రేడ్ వర్గాలు వెల్లడించాయి. అయితే ఈ సినిమాకు అత్యధిక ఫుట్‌ఫాల్స్ నమోదు అయ్యాయి.

గిల్లీ సినిమాకు ఓవర్సీస్‌లో కూడా భారీ వసూళ్లు సాధించింది. సింగపూర్‌లో తొలి రోజు 47 వేల సింగపూర్ డాలర్లు వసూలు చేసింది. ఇక అమెరికా, ఇతర దేశాల్లో కూడా అత్యధిక వసూళ్లను రాబట్టింది. దాంతో ఈ సినిమా తొలి రోజు 400K అంటే.. సుమారుగా 4 కోట్లకుపైగా వసూళ్లను నమోదు చేసింది.

ప్రపంచవ్యాప్తంగా గిల్లీ చిత్రం తొలి రోజు కలెక్షన్ల వివరాల్లోకి వెళితే.. ఈ చిత్రం 4.5 కోట్లు తమిళనాడులో, 1 కోటి రూపాయలు ఇతర రాష్ట్రాల్లో వసూలు చేసింది. ఓవర్సీస్‌లో 4 కోట్ల రూపాయలు కలిపితే ఈ చిత్రం 9.5 కోట్ల రూపాయలు రాబట్టిందని ట్రేడ్ వర్గాలు వెల్లడించాయి. ఇక రెండో రోజు 10 కోట్ల రూపాయలు వసూలు చేస్తుందని ట్రేడ్ నిపుణులు అంచనా వేస్తున్నారు.