Devara Day 19 Collections: దేవర సరికొత్త సంచలనం.. 500 కోట్ల ఎన్టీఆర్ మూవీ రికార్డు!

దేవర చిత్రం బాక్సాఫీస్ వద్ద రికార్డు కలెక్షన్లతో దూసుకుపోతున్నది. యంగ్ టైగర్ ఎన్టీఆర్, జాన్వీ కపూర్ జంటగా నటించిన ఈ చిత్రం మూడో వారంలో కూడా భారీ వసూళ్లను రాబడుతున్నది. కొరటాల శివ దర్శకత్వంలో రూపొందిన ఈ సినిమా 500 కోట్ల కలెక్షన్ల దిశగా పరుగులు పెడుతున్నది. ఎన్టీఆర్ ఆర్ట్స్, యువ సుధ బ్యానర్లపై నందమూరి కల్యాణ్ రామ్ నిర్మించిన ఈ సినిమా నమోదు చేసిన సరికొత్త రికార్డుల వివరాల్లోకి వెళితే..

దేవర చిత్రం తొలివారం బాక్సాఫీస్‌ను షేక్ చేసింది. ఈ సినిమా తెలుగు రాష్ట్రాల్లో 165 కోట్ల రూపాయలు, హిందీలో 45 కోట్ల రూపాయలు, కర్ణాటకలో 24 కోట్ల రూపాయలు, తమిళంలో 5 కోట్ల రూపాయలు, మలయాళంలో 2 కోట్ల రూపాయల కలెక్షన్లు రాబట్టింది. ఇక ఈ సినిమా తొలివారం 220 కోట్ల రూపాయల వసూళ్లను నమోదు చేసింది.

ఎన్టీఆర్ నటించిన దేవర చిత్రం రెండోవారంలో కూడా అదే జోష్‌ను కొనసాగించింది. తెలుగులో 30 కోట్ల రూపాయలు, హిందీలో 15 కోట్ల రూపాయలు, కన్నడలో 5 కోట్ల రూపాయలు, తమిళంలో 2 కోట్ల రూపాయలు, మలయాళంలో 50 లక్షలు వసూలు చేసింది. దాంతో ఈ చిత్రం 52.5 కోట్ల రూపాయలు రాబట్టింది.

ఇక మూడో వారంలో దేవర చిత్రం నిలకడగా కలెక్షన్లను రాబట్టింది. ఈ సినిమా 15వ రోజు 3 కోట్ల రూపాయలు, 16వ రోజు 5.5 కోట్ల రూపాయలు, 17వ రోజు 5.5 కోట్ల రూపాయలు, 18వ రోజున 2.5 కోట్లు వసూలు చేసింది. ఇక 19వ రోజు ఈ సినిమా 1.5 కోట్ల రూపాయలు వసూలు చేసింది. దాంతో ఈ సినిమా 17 కోట్ల రూపాయలు రాబట్టింది.

దేవర చిత్రం ఇండియా కలెక్షన్ల విషయానికి వస్తే.. తొలివారం 220 కోట్లు, రెండోవారం 52.5 కోట్లు, మూడో వారంలో ఇప్పటి వరకు 17 కోట్ల రూపాయలు వసూలు చేసింది. దాంతో ఈ సినిమా అన్ని భాషల్లో కలిపి 320 కోట్ల నికరంగా కలెక్షన్లను రాబట్టింది. ఓవర్సీస్‌లో ఈ చిత్రం 80 కోట్లకుపైగా వసూళ్లనురాబట్టింది. దాంతో ఈ సినిమా వరల్డ్ వైడ్‌గా 400 కోట్ల నికరంగా 500 కోట్ల రూపాయల గ్రాస్ వసూళ్లను రాబట్టింది.

ఈ చిత్రం 400 కోట్ల రూపాయల నికర వసూళ్ల జాబితాలో చేరింది. ఇప్పటికీ సాహో, బాహుబలి1, సాలార్ 1, కల్కి 2898 AD, RRR, బాహుబలి 2 తర్వాత దేవర ఈ ఘనతను సాధించింది. ఇంకా ఈ చిత్రం భారీ వసూళ్లను రాబడుతున్నది. ఈ సినిమా ఎన్టీఆర్ కెరీర్‌లో సంచలన విజయం సాధించింది.