MSVPG Overseas Collections: ఓవర్సీస్‌లో శంకర వరప్రసాద్ సంచలనం.. చిరంజీవి మూవీకి ఎన్ని కోట్లంటే?

మెగాస్టార్ చిరంజీవి నటించిన మాస్ ఎంటర్‌టైనర్ మన శంకర వరప్రసాద్ గారు (Mana Shankara Varaprasad Garu). తన కెరీర్‌లో 157వ చిత్రంగా రూపొందిన ఈ సినిమాకు వరుస సక్సెస్‌లతో తెలుగు సినీ ఇండస్ట్రీలో దూసుకెళ్తున్న అనిల్ రావిపూడి దర్శకత్వం వహించారు. ఈ మూవీని చిరంజీవి కూతురు సుస్మిత కొణిదెల, నిర్మాత సాహు గారపాటి తమ గోల్డ్ బాక్స్ ఎంటర్‌టైన్‌మెంట్స్, షైన్ స్క్రీన్ బ్యానర్లపై నిర్మించారు

ఈ చిత్రంలో చిరంజీవి సరసన నయనతార, క్యాథరీన్ త్రెసా హీరోయిన్లుగా నటించారు. విక్టరీ వెంకటేష్ స్పెషల్ అప్పీయరెన్స్‌తో సందడి చేశారు. .ఈ చిత్రానికి సినిమాటోగ్రాఫర్‌గా సమీర్ రెడ్డి, ఎడిటర్‌గా తమ్మిరాజు, సంగీత దర్శకుడిగా భీమ్స్ సిసిరిలియో వ్యవహరించారు. ఈ సినిమా సంక్రాంతి కానుకగా జనవరి 12వ తేదీన ప్రపంచవ్యాప్తంగా గ్రాండ్‌గా రిలీజ్ అయింది. ఈ సినిమా బడ్జెట్, బిజినెస్, ఓవర్సీస్ కలెక్షన్ల వివరాల్లోకి వెళితే..

వరల్డ్ వైడ్ బిజినెస్ ఎంతంటే?
ఇక ఈ సినిమా తెలుగు రాష్ట్రాల బిజినెస్ వివరాల్లోకి వెళితే.. ఈ చిత్రం ఆంధ్రా థియేట్రికల్ హక్కులు 55 కోట్ల రూపాయలు, నైజాం హక్కులు 32 కోట్ల రూపాయలు, సీడెడ్ రైట్స్ 18 కోట్ల రూపాయల మేర వాల్యూ జరిగింది. ఈ సినిమా తెలుగు రాష్ట్రాల్లో 105 కోట్ల రూపాయల బిజినెస్ చేసింది. కర్ణాటక హక్కులు 10 కోట్ల మేర, ఇతర రాష్ట్రాల రైట్స్ 5 కోట్ల మేర జరిగింది. దాంతో ఇండియా రైట్స్ సుమారుగా 120 కోట్ల మేర వాల్యూ కట్టారు అని ట్రేడ్ వర్గాలు వెల్లడించాయి. ఇక ఓవర్సీస్ రైట్స్ విషయానికి వస్తే.. ఈ సినిమా నార్త్ అమెరికా థియేట్రికల్ రైట్స్ సుమారుగా 20 కోట్ల రూపాయల మేర ట్రేడ్ జరిగింది. దాంతో ఈ సినిమా వరల్డ్ వైడ్ బిజినెస్ 140 నుంచి 150 కోట్ల రూపాయల మేర జరిగిందనే టాక్ బిజినెస్ వర్గాల్లో ఉంది.

ఓవర్సీస్‌లో భారీగా
భారీ అంచనాలతో రిలీజైన ఈ సినిమాకు తొలి ఆట నుంచే సూపర్ హిట్ టాక్‌తో దూసుకెళ్తున్నది. విడుదలైన ప్రతీ చోట కాసుల వర్షం కురిపిస్తున్నది అని ట్రేడ్ వర్గాలు వెల్లడిస్తున్నాయి. ముఖ్యంగా ఈ సినిమాకు ఓవర్సీస్‌లో మంచి స్పందన లభిస్తున్నది. హాలీవుడ్ సినిమాలు, సంక్రాంతి పండుగ సినిమాలు పోటీని తట్టుకొని భారీ వసూళ్లను సాధిస్తున్నది. ఈ సినిమా చిరంజీవి కెరీర్‌లో హయ్యెస్ట్ కలెక్షన్లు సాధిస్తున్నది అని ట్రేడ్ వర్గాలు వెల్లడిస్తున్నాయి.

నార్త్ అమెరికాలో
నార్త్ అమెరికాలో శంకర వరప్రసాద్ చిత్రం భారీగా వసూళ్లను సాధిస్తున్నది. ఈ చిత్రం ఇప్పటి వరకు అమెరికా, కెనడాలో కలిపి 2.5 మిలియన్ డాలర్లు అంటే.. సుమారుగా 23 కోట్ల రూపాయలు వసూలు చేసింది. ఈ వారాంతంలో ఈ చిత్రం 3 మిలియన్ డాలర్లు వసూళ్లకు చేరువ కావడం గ్యారెంటీ అనే విశ్వాసాన్ని ట్రేడ్ వర్గాలు వ్యక్తం చేస్తున్నాయి.

ఆస్ట్రేలియాలో కలెక్షన్లు
ఆస్ట్రేలియాలో కూడా ఈ సినిమా రికార్డు వసూళ్లను నమోదు చేసిందని శంకర వరప్రసాద్ నిర్మించిన షైన్ స్క్రీన్ అధికారికంగా కలెక్షన్లను ప్రకటించింది. ఈ చిత్రం 4 రోజుల్లో 300K ఆస్ట్రేలియన్ డాలర్లు అంటే.. సుమారుగా 2 కోట్ల రూపాయలు రాబట్టింది అని ట్రేడ్ వర్గాలు వెల్లడించాయి.

యూకే, ఐర్లాండ్ దేశాల్లో
ఇదిలా ఉండగా, యూకే, ఐర్లాండ్ దేశాల్లో కూడా మన శంకర వరప్రసాద్ చిత్రం రికార్డు స్థాయి వసూళ్లను రాబడుతున్నది. ఈ చిత్రం గత 4 రోజుల్లో భారీగా అంటే.. సుమారుగా 202K పౌండ్స్ అంటే.. బారతీయ కరెన్సీలో 2.5 కోట్ల రూపాయలు వసూలు చేసింది. ఈ సినిమాకు ఇంకా భారీగా డిమాండ్ కనిపిస్తుందని ట్రేడ్ వర్గాలు వెల్లడించాయి.

ఓవర్సీస్ కలెక్షన్లు ఎంతంటే?
ఓవర్సీస్‌లో శంకర వరప్రసాద్ గారి హావా కొనసాగుతుందనే విషయం కలెక్షన్లు రుజువు చేస్తున్నాయి. అమెరికా, యూకే, ఆస్ట్రేలియాలో కలిపి ఈ సినిమా 27.5 కోట్ల రూపాయలు వసూలు చేసింది. మిడిల్ ఈస్ట్, మలేషియా, సింగపూర్, ఇతర దేశాల వసూళ్ల సమాచారం అందాల్సి ఉంది అని ట్రేడ్ వర్గాలు వెల్లడించాయి.