MSVG North America Box Office Collections: మన శంకర వరప్రసాద్ గారు యూఎస్ బాక్సాఫీస్.. ఎన్ని కోట్ల కలెక్షన్లంటే?

మెగాస్టార్ చిరంజీవి నటించిన మాస్ ఎంటర్‌టైనర్ మన శంకర వరప్రసాద్ గారు (Mana Shankara Varaprasadgaru). తన కెరీర్‌లో 157వ చిత్రంగా రూపొందిన ఈ సినిమాకు వరుస సక్సెస్‌లతో తెలుగు సినీ ఇండస్ట్రీలో దూసుకెళ్తున్న అనిల్ రావిపూడి దర్శకత్వం వహించారు. ఈ మూవీని చిరంజీవి కూతురు సుస్మిత కొణిదెల, నిర్మాత సాహు గారపాటి తమ గోల్డ్ బాక్స్ ఎంటర్‌టైన్‌మెంట్స్, షైన్ స్క్రీన్ బ్యానర్లపై నిర్మిస్తున్నారు.

ఈ చిత్రంలో చిరంజీవి సరసన నయనతార, క్యాథరీన్ త్రెసా హీరోయిన్లుగా నటిస్తున్నారు. విక్టరీ వెంకటేష్ స్పెషల్ అప్పీయరెన్స్‌తో సందడి చేయబోతున్నారు.ఈ చిత్రానికి సినిమాటోగ్రాఫర్‌గా సమీర్ రెడ్డి, ఎడిటర్‌గా తమ్మిరాజు, సంగీత దర్శకుడిగా భీమ్స్ సిసిరిలియో వ్యవహరిస్తున్నారు. ఈ సినిమా సంక్రాంతి కానుకగా జనవరి 12వ తేదీన ప్రపంచవ్యాప్తంగా గ్రాండ్‌గా రిలీజ్ అవుతున్నది. అయితే ఈ సినిమాలో చిరంజీవి, వెంకీ కాంబినేషన్ స్పెషల్ ఎట్రాక్షన్ కావడంతో భారీగా బిజినెస్ జరిగింది. ఈ చిత్రానికి సంబంధించిన నార్త్ అమెరికా బాక్సాఫీస్ కలెక్షన్ల వివరాల్లోకి వెళితే..

సంక్రాంతి పండుగ సీజన్‌లో చిరంజీవి మూవీ వస్తుండటంతో ట్రేడ్ సర్కిల్‌లో భారీగానే అంచనాలు పెరిగాయి. అంచనాలకు తగినట్టుగానే ఈ సినిమా నార్త్ అమెరికా బిజినెస్ భారీగా జరిగింది. ఈ సినిమా నార్త్ అమెరికా థియేట్రికల్ రైట్స్ సుమారుగా 20 కోట్ల రూపాయలు చెల్లించి సొంతం చేసుకొన్నారు. ఈ సినిమా అమెరికా, కెనడాలో డిస్ట్రిబ్యూటర్ లాభాల్లోకి రావాలంటే కనీసం 5 మిలియన్ డాలర్లు వసూలు చేయాల్సి ఉంటుందని ట్రేడ్ వర్గాలు అంచనా వేశాయి.

అయితే ఈ సినిమా అడ్వాన్స్ బుకింగ్ అనుకొన్న వేగంగా జరగకపోగా.. కాస్త నెమ్మదిగానే మొదలైంది. అయితే ఈ సినిమా ప్రమోషన్స్‌లో వైవిధ్యం ఉండటం, అలాగే ప్రీ రిలీజ్ తర్వాత చిరంజీవి వింటేజ్ సాంగ్‌కు అనూహ్యమైన రెస్సాన్స్ వచ్చింది. దాంతో ఈ సినిమా అడ్వాన్స్ బుకింగ్ ఊపందుకొన్నది. ఈ సినిమా 1 మిలియన్ డాలర్ క్లబ్‌ వైపు అడుగులేస్తున్నది.

నార్త్ అమెరికాలో సుమారుగా 500 లోకేషన్లలో రిలీజ్ చేస్తున్నట్టు నిర్మాతలు తెలిపారు. ఈ సినిమా కోసం దాదాపు 1600 షోలు ప్రదర్శించేందుకు ఏర్పాట్లు చేశారు. ఇప్పటికే ఈ సినిమా 25 వేల టికెట్లు అమ్ముడుపోయాయి. దాంతో ఈ సినిమా 500000 డాలర్లకుపైగా కలెక్షన్లు అంటే భారతీయ కరెన్సీలో 4.5 కోట్ల రూపాయలు వసూలు చేసింది. ఇంకా రెండు రోజులు సమయం ఉండటం వల్ల అడ్వాన్స్ బుకింగ్ కలెక్షన్లు భారీగా పెరిగే అవకాశం ఉందని ట్రేడ్ వర్గాలు వెల్లడించాయి.