Mission Impossible 8 Day 3 Collection: టామ్ క్రూజ్ బాక్సాఫీస్ సంచలనం..మిషన్ ఇంపాజిబుల్ 8 కలెక్షన్లు ఇవే

ప్రపంచ సినిమా రంగంలో అత్యంత పాపులారిటీ ఉన్న ఫ్రాంచైజీలో మిషన్: ఇంపాసిబుల్ ఒకటి అనడంలో ఎలాంటి సందేహం లేదు. ఈ సిరీస్‌లో భాగంగా ఇటీవల విడుదలైన 8వ చిత్రం మిషన్ ఇంపాజిబుల్ ది ఫైనల్ రెకానింగ్. ఈ సినిమాకు సంబంధించిన పార్ట్ వన్ మూవీ 2023 సంవత్సరంలో రిలీజైంది. దానికి రెండో పార్ట్‌గా ప్రస్తుతం మిషన్ ఇంపాజిబుల్ ది ఫైనల్ రెకానింగ్ మే 17 తేదీన ఇండియాలో గ్రాండ్‌గా రిలీజైంది. ఈ సినిమా అమెరికా, ఇతర దేశాల్లో మే 23వ తేదీన విడుదల కానున్నది. ఈ సినిమా ఇండియా కలెక్షన్లు, ఈ మూవీ బడ్జెట్ వివరాల్లోకి వెళితే..

హాలీవుడ్ సూపర్ స్టార్ టామ్ క్రూజ్ నటించిన ఈ చిత్రంలో హేలీ ఎట్‌వెల్, వింగ్ రేమ్స్, సైమన్ పెగ్, ఇసాయి మోరేల్స్, పామ్ క్లెమెంటీఫ్, హెన్నీ జార్నీ తదితరులు నటించారు. ఈ చిత్రానికి క్రిస్టఫర్ మాక్క్వెరీ దర్వకత్వం వహించారు. యాక్షన్ థ్రిల్లర్‌గా రూపొందిన ఈ సినిమాను ప్రపంచంలోని పలు దేశాల్లో అందమైన పర్వత ప్రాంతాల్లో చిత్రీకరించారు. ఈ సినిమాను సుమారుగా 300 మిలియన్ డాలర్లు అంటే.. భారతీయ కరెన్సీలో సుమారుగా 2570 కోట్ల రూపాయలతో నిర్మించారు.

మిషన్ ఇంపాసిబుల్ సినిమాకు తొలి రోజు ఇండియాలో వివిధ భాషల్లో భారీగా వసూళ్లు నమోదు అయ్యాయి. ఈ సినిమా ఇంగ్లీష్ వెర్షన్ 11 కోట్ల రూపాయలు, హిందీలో 5 కోట్ల రూపాయలు, తెలుగులో 1 కోటి రూపాయలు, కన్నడలో 2 కోట్ల రూపాయలు, తమిళనాడులో 50 లక్షల రూపాయలు వసూలు చేసింది. ఈ సినిమా తొలి రోజు ఇండియాలో 18.5 కోట్ల రూపాయలు వసూలు చేసింది. ఇటీవల కాలంలో అంటే 2025 సంవత్సరంలో ఏ హాలీవుడ్ సినిమా సాధించనటువంటి ఓపెనింగ్స్‌ను ఈ చిత్రం రాబట్టింది.

ఇక మిషన్ ఇంపాసిబుల్ 8 సిరీస్‌కు రెండో రోజ కూడా ఇండియాలో రికార్డు కలెక్షన్లు నమోదు అయ్యాయి. ఈ సినిమా శనివారం రిలీజ్ కావడంతో ఆదివారం కూడా అదే జోరు, జోష్ బాక్సాఫీస్ వద్ద కనిపించింది. ఈ సినిమా రెండో రోజున ఇంగ్లీష్ వెర్షన్ 11 కోట్ల రూపాయలు, హిందీలో 5.5 కోట్ల రూపాయలు, తెలుగు వెర్షన్ 50 లక్షల రూపాయలు, కన్నడలో 2.5 కోట్ల రూపాయలు, తమిళంలో 50 లక్షల రూపాయలు వసూలు చేసింది. దాంతో ఈ మూవీ 20 కోట్ల రూపాయలు వసూలు చేసింది.

ఇక టామ్ క్రూజ్ నటించిన ఈ సినిమాకు 3వ రోజు బాక్సాఫీస్ వద్ద పాజిటివ్‌గానే స్పందన వ్యక్తమైంది. ఈ సినిమాకు మార్నింగ్ షో 35 శాతం ఆక్యుపెన్సీ, మ్యాట్నీకి 50 శాతం ఆక్యుపెన్సీ, ఫస్ట్ షోకు 55 శాతం, సెకండ్ షోకు 45 శాతం ఆక్యుపెన్సీ నమోదు అయింది. ఈ మూవీ సోమవారం రోజున నిలకడగా వసూళ్లు రాబట్టే అవకాశం ఉందని ట్రేడ్ వర్గాలు వెల్లడించాయి. ఈ సినిమా మూడో రోజున 5 నుంచి 7 కోట్ల రూపాయలు వసూలు చేస్తుందని ట్రేడ్ వర్గాలు వెల్లడించాయి.

మిషన్ ఇంపాసిబుల్ 8 సినిమా నార్త్ అమెరికా, ఇతర దేశాల్లో ఇంకా రిలీజ్ కాలేదు. ఈ సినిమా యూఎస్‌లో మే 23వ తేదీన రిలీజ్ కానున్నది. ఈ సినిమా ఇండియా కలెక్షన్ల వివరాల్లోకి వెళితే.. ఇండియాలో 38.5 కోట్ల రూపాయలు నెట్, 45 కోట్ల రూపాయల గ్రాస్ వసూళ్లను రాబట్టింది. ఇక ఈ చిత్రం గల్ఫ్, ఇతర ప్రాంతాల్లో మొత్తంగా 175 కోట్ల రూపాయలు వసూలు చేసింది అని ట్రేడ్ వర్గాలు పేర్కొన్నాయి.