పోకిరి: 63 కేంద్రాలలో 175 రోజులు

By Staff

| Published: Tuesday, November 9, 2004, 23:53 [IST]

మామూలుగా చూస్తే అది ఒక సాదాసీదా చిత్రం. ఒక యువకుడు జులాయిలా వీధుల వెంట తిరుగుతూ.. అల్లరిచిల్లరి పనులు చేస్తూ.. మాఫియా ముఠాలతో కలిసి డబ్బు కోసం ఏ పనైనా చేస్తుంటాడు. మధ్యలో ఒకమ్మాయిని చూసి ప్రేమలో పడతాడు. ఆ అమ్మాయిని మాఫియా ముఠా కాకుండా ఒక పోలీస్‌ ఆఫీసర్‌ వేధిస్తుంటాడు. అతడి బారి నుంచి హీరోయిన్‌ని రక్షిస్తుంటాడు హీరో. అతనికీ ఆ అమ్మాయి మనసు ఇస్తుంది.. ఐ లవ్‌ యూ చెప్పే టైమ్‌కి వాళ్లిద్దరి మధ్య నుంచి బులెట్‌ దూసుకుపోవడం.. నేను ఎంత యెదవనో నాకే తెలియదని హీరో తన నిజస్వరూపం ఆమెకు చెప్పడం.. అతడిని ప్రేమించాలా వద్దా అని హీరోయిన్‌ డైలమో.. చివరికి చిన్న ట్విస్ట్‌.. హీరో అతడనుకునేంత, ప్రేక్షకులు అనుకునేంత దుర్మార్గుడు కాదు, ఒక మంచి పోలీస్‌ ఆఫీసర్‌ అని తెలియడం, శేషంగా మిగిలిన విలన్లను హీరో అంతం చేసి.. ఆ వూరిని రక్షించడం.. ఇంతే కథ.. ఇలాంటి కథలు తెలుగులోనూ, భారతదేశ చలనచిత్ర చరిత్రలోనూ కొత్తేం కాదు. సినిమా పుట్టిన నాటి నుంచి అడపాదడపా ఇలాంటి కథలు వస్తునే ఉన్నాయి. కానీ అవేవీ చరిత్ర సృష్టించలేదు.. పోకిరీ లాగ. మరి పోకిరీలో ప్రత్యేకత ఏమిటి?

ఇదే విషయాన్ని ఇటీవల దర్శకుడు పూరీ జగన్నాథ్‌ని కలిసి అడిగినప్పుడు.. ఆ సినిమాకి అన్నీ కలిసొచ్చాయండీ.. అని క్లుప్తంగా చెప్పారంతే. ఎంత కలిసొస్తే మాత్రం పోకిరి ఇన్ని రికార్డులు బద్దలకొడుతుందా? 63 కేంద్రాలలో 175 రోజులు ఆడిన పోకిరి చిత్రం భారత చలనచిత్ర రంగంలోనే ఒక చరిత్ర సృష్టించింది.

ఈ చిత్రం ఇప్పటికే 40 కోట్ల రూపాయలు పైగా వసూలు చేసిందని ట్రేడ్‌ వర్గాల అంచనా. ఒక స్టార్‌కి సూపర్‌స్టార్‌డమ్‌ అందించిన చిత్రం పోకిరి. మహేశ్‌బాబుకి కెరీర్‌లో ఇంతకన్నా కావాల్సిందేముంటుంది? అతని అద్భుతమైన నటన, హీరోయిన్‌ ఇలియానా అందచందాలు, మణిశర్మ సంగీతం, ముఖ్యంగా హీరో క్యారక్టరైజేషన్‌లో మొదటి నుంచి చివరివరకూ ఒకే ఎనర్జీ లెవెల్‌ మెయింటేన్‌ చేయడంలో దర్శకుడు చూపిన ప్రతిభ.. ఇంతకుమించి ఈ సినిమా ఘనవిజయం సాధించడానికి అంశాలేమీ కనపడవు.

ఈ సినిమా చాలారకాలుగా చాలామందికి మంచి చేసింది. మహేశ్‌ కెరీర్‌ నిలిపింది. ఇలియానాను టాప్‌ హీరోయిన్‌ చేసింది. పూరీ జగన్నాథ్‌కు సూపర్‌ డైరెక్టర్‌ హోదా ఇచ్చేసింది. అన్నింటికీ మించి తెలుగు చలనచిత్ర పరిశ్రమ చాలాకాలంగా ఎదురుచూస్తున్న ఒక సాలిడ్‌ హిట్‌ పోకిరి చిత్రం ద్వారా అందింది.

మహేశ్‌బాబు తదుపరి చిత్రం సైనికుడు కూడా సిద్ధమవుతోంది. పోకిరి ప్రభంజనం సాధించిన నేపథ్యంలో వస్తున్న ఆ చిత్రం మరెన్ని అద్భుతాలు చేస్తుందో అన్న ఆసక్తి అందరిలోనూ ఉంది.

మరిన్నికథనాలు