Salaar: యూఎస్‌లో సలార్ సెన్సేషన్.. అప్పుడే అన్ని కోట్ల వసూళ్లు.. ఆ రికార్డు బద్దలవడం ఖాయం

పేరుకు తెలుగు హీరోనే అయినా దేశ వ్యాప్తంగా క్రేజ్‌ను సొంతం చేసుకున్నాడు యంగ్ రెబెల్ స్టార్ ప్రభాస్. అందుకే ఈ మధ్య కాలంలో వరుసగా సినిమాలు మీద సినిమాలు చేస్తూ తన రేంజ్‌ను పెంచుకుంటూ వెళ్తున్నాడు.

ఈ జోష్‌లోనే ఈ పాన్ ఇండియా స్టార్ ఇప్పుడు చేతి నిండా మూవీలు చేస్తున్నాడు. అందులో ఫుల్ లెంగ్త్ యాక్షన్ ఎంటర్‌టైనర్‌గా రూపొందుతోన్న 'సలార్' ఒకటి. త్వరలోనే ఈ సినిమా విడుదల కాబోతుంది. ఈ నేపథ్యంలో తాజాగా ఈ చిత్రం అదిరిపోయే ఫీట్‌ను సాధించింది. ఆ వివరాలేంటో మీరే చూసేయండి!

సలార్‌గా వస్తున్న ప్రభాస్: ప్రభాస్ హీరోగా ప్రశాంత్ నీల్ తీసిన సినిమానే 'సలార్'. ఈ మూవీ హొంబళే ప్రొడక్షన్స్ బ్యానర్‌పై విజయ్ కిరగందుర్ నిర్మించారు. ఇందులో శృతి హాసన్ హీరోయిన్‌గా.. జగపతి బాబు, పృథ్వీరాజ్ సుకుమారన్ విలన్లుగా చేశారు. రవి బస్రూర్ ఈ చిత్రానికి సంగీతం ఇచ్చాడు. శ్రీయా రెడ్డి, టిన్ను ఆనంద్, బాబీ సింహా, ఈశ్వరీ రావు సహా ఎంతో మంది ఇందులో నటిస్తున్నారు.

ఫస్ట్ పార్ట్ రిలీజ్ రెడీగానే: రెండు భాగాలుగా రాబోతున్న ఈ సినిమాలో ఫస్ట్ పార్ట్‌ను 'సలార్: సీజ్‌ఫైర్‌'గా డిసెంబర్ 22న రిలీజ్ చేస్తుతున్నారు. ఈ నేపథ్యంలో చిత్ర యూనిట్ టీజర్‌తో పాటు ట్రైలర్‌ను కూడా విడుదల చేసింది. అలాగే, ప్రమోషన్ కార్యక్రమాలను కూడా ప్రారంభించబోతున్నారు. ఇందులో భాగంగానే త్వరలోనే మరో ట్రైలర్‌ను రిలీజ్ చేయడంతో పాటు భారీ ఈవెంట్లను కూడా చేయబోతున్నారు.

అక్కడ బుకింగ్ మొదలు: ప్రభాస్ - ప్రశాంత్ నీల్ కాంబినేషన్‌లో రాబోతున్న 'సలార్: సీజ్‌ఫైర్‌' మూవీ రిలీజ్ డిసెంబర్ 22వ తేదీన ఉండడంతో ఓవర్సీస్‌లో దీనికి సంబంధించిన బుకింగ్స్ ఓపెన్ అయిపోయాయి. అక్కడ ఈ చిత్రానికి అదిరిపోయే రెస్పాన్స్ కూడా వస్తోంది. దీంతో అప్పుడే కలెక్షన్లను కూడా భారీగానే వసూలు చేసింది. త్వరలోనే తెలుగులో సైతం బుకింగ్స్ ఓపెన్ అవబోతున్నాయి.

అప్పుడే అన్ని డాలర్లతో: యంగ్ రెబెల్ స్టార్ ప్రభాస్ నటించిన 'సలార్: సీజ్‌ఫైర్' మూవీకి సంబంధించి యూఎస్‌లో అడ్వాన్స్ సేల్స్ జోరుగా సాగుతున్నాయి. అక్కడ 340 లొకేషన్లలో 1104 షోలకు గానూ అమ్మకాలు ప్రారంభించగా.. ఇప్పటికే 20021 టికెట్లు కూడా అమ్ముడుపోయినట్లు తెలిసింది. ఇలా ఈ సినిమా అక్కడ అప్పుడే 539K డాలర్లను కూడా వసూలు చేసి సత్తా చాటుకుంది.

ఆ రికార్డు బద్దలవడమే: యూఎస్‌లో ప్రభాస్ సినిమాలకు అడ్వాన్స్ సేల్స్ అదిరిపోయే రీతిలో సాగుతున్నాయి. ఈ క్రమంలోనే అక్కడ 'ఆదిపురుష్' మూవీకి ప్రీమియర్స్‌ ద్వారా 825K డాలర్లు వచ్చాయి. ఇప్పుడు ఈ రికార్డును 'సలార్: సీజ్‌ఫైర్' బ్రేక్ చేయబోతున్నట్లు ట్రేడ్ విశ్లేషకులు అంచనాలు వేస్తున్నారు. రిలీజ్‌కు ఇంకా 12 రోజుల సమయం ఉండడంతో 1 మిలియన్ మార్క్ కూడా దాటొచ్చు.