Raja Shivaji Box Office: రాజా శివాజీ బాక్సాఫీస్ కాసుల వర్షం.. మరాఠీ చిత్రానికి ఎన్ని కోట్ల కలెక్షన్లంటే?

Updated: Sunday, May 3, 2026, 19:48 [IST]

బాలీవుడ్ స్టార్ హీరో రితేష్ దేశ్‌ముఖ్ దర్శకుడిగా మారి తెరకెక్కించిన చిత్రం రాజా శివాజీ. మరాఠా సామ్రాజ్యాన్ని నిర్మించిన చత్రపతి శివాజీ జీవితంలోని కీలక ఘట్టాలను ఆధారంగా తీసుకొని ఈ సినిమాను హీరోయిన్ జెనీలియా దేశ్‌ముఖ్, జ్యోతి దేశ్‌పాండే నిర్మించారు. ఈ చిత్రంలో శివాజీగా రితేష్ దేశ్‌ముఖ్ నటించగా, ఇతర పాత్రల్లో సంజయ్ దత్, అభిషేక్ బచ్చన్, మహేష్ మంజ్రేకర్, సచిన్ ఖేడ్కర్, విద్యా బాలన్, భాగ్యశ్రీ, ఫర్దీన్ ఖాన్, జెనీలియా దేశ్‌ముఖ్ నటించారు. ఈ చిత్రంలో సల్మాన్ ఖాన్ అతిథి పాత్రల్లో మెరిసారు.

ఈ సినిమా సాంకేతిక విభాగాల వివరాల్లోకి వెళితే.. సినిమాటోగ్రఫి: సంతోష్ శివన్, ఎడిటింగ్: ఊర్వశీ సక్సేనా, మ్యూజిక్: అతుల్ అజయ్ తమ బాధ్యతలను నిర్వర్తించారు. ముంబై ఫిలిం కంపెనీ, జియో స్టూడియోస్ బ్యానర్‌పై రూపొందిన ఈ చిత్రం మరాఠీ, హిందీ భాషల్లో రిలీజైంది. మే 1వ తేదీన ప్రపంచవ్యాప్తంగా రిలీజైన ఈ సినిమా బడ్జెట్ ఎంత? ఈ సినిమా వసూలు చేస్తున్న కలెక్షన్ల వివరాలు ఎంత? అనే వివరాల్లోకి వెళితే..

భారతీయ చరిత్రలో కీలక భాగంగా నిలిచిన మరాఠా సామ్రాజ్య విస్తరణలో శివాజీ చూపిన ధైర్య సాహసాల నేపథ్యంగా హిస్టారికల్ యాక్షన్ డ్రామాగా రూపొందిన ఈ చిత్రంలో భారీ తారాగణంతోపాటు స్టార్ వాల్యూ ఉన్న నటీనటులు నటించారు. అంతేకాకుండా ఈ సినిమాను అత్యంత భారీ వ్యయంతో క్వాలిటీ విషయంలో రాజీ పడకుండా నిర్మించారు. ఈ సినిమా నటీనటులు, సాంకేతిక నిపుణుల రెమ్యునరేషన్లు, ప్రొడక్షన్, ప్రమోషనల్ కాస్ట్ అంతా కలిపి సుమారుగా 100 కోట్ల బడ్జెట్‌తో నిర్మించారు.

రాజా శివాజీ సినిమా ప్రోమోలకు మంచి స్పందన రావడం, అలాగే ప్రమోషనల్ కార్యక్రమాలకు అనూహ్యమైన రెస్పాన్స్ రావడంతో రిలీజ్‌కు ముందే ఈ చిత్రం భారీ ఆదరణకు గురైంది. దాంతో ఈ సినిమాను దేశవ్యాప్తంగా 3500 స్క్రీన్లలో రిలీజ్ చేశారు. ఈ సినిమా బజ్ భారీగా ఉండటంతో అడ్వాన్స్ బుకింగ్ కూడా భారీగా జరిగింది. ఈ చిత్రం 90 కోట్ల రూపాయల బ్రేక్ ఈవెన్ టార్గెట్‌తో బాక్సాఫీస్ జర్నీని మొదలు పెట్టింది అని ట్రేడ్ వర్గాలు వెల్లడించాయి.

రాజా శివాజీ సినిమా కలెక్షన్ల వివరాల్లోకి వెళితే.. ఈ సినిమాకు తొలి ఆట తర్వాత హిట్ టాక్ రావడంతో కలెక్షన్లు కూడా భారీగా నమోదు అయ్యాయి. మరాఠా సినిమా ఇండస్ట్రీలో అత్యధిక వసూళ్లను నమోదు చేస్తున్న చిత్రాల్లో ఒకటిగా ఘనతను సొంతం చేసుకొన్నది. ఈ చిత్రం తొలి రోజు 11.5 కోట్ల రూపాయలు వసూలు చేసింది. రెండో రోజు 10.55 కోట్ల రూపాయలు రాబట్టింది. దాంతో ఈ చిత్రం రెండు రోజుల్లో 22 కోట్ల రూపాయల నెట్ వసూళ్లను నమోదు చేసింది అని ట్రేడ్ వర్గాలు వెల్లడించాయి.

ఇక ఈ సినిమా మరాఠీలో రికార్డు లెవెల్ కలెక్షన్లను నమోదు చేస్తున్నది. తొలి రోజు మరాఠీ వెర్షన్ సుమారుగా 8.5 కోట్ల రూపాయలు రాబట్టింది. రెండో రోజు 7 కోట్లకుపైగా కలెక్షన్లను నమోదు చేసింది. హిందీలో తొలి రోజు 6.5 కోట్ల రూపాయలు, రెండో రోజు 3.25 కోట్ల రూపాయలు రాబట్టింది. దాంతో సుమారుగా 25 కోట్లకుపైగా గ్రాస్ కలెక్షన్లను నమోదు చేసింది.

ఇక మూడో రోజు కూడా ఈ చిత్రం భారీగానే వసూళ్లను రాబడుతుందని ట్రేడ్ వర్గాలు వెల్లడించాయి. మూడో రోజు కూడా 10 కోట్ల రూపాయలు వసూలు చేస్తుందని అని తెలిపారు. మరాఠీలో 7 కోట్ల రూపాయలు, హిందీలో3 కోట్ల రూపాయలు వసూలు చేస్తుందని అంచనా వేస్తున్నారు. దాంతో ఈ చిత్రం 35 కోట్లకుపైగా గ్రాస్ వసూళ్లను నమోదు చేసే అవకాశం ఉంది. ఈ చిత్రం త్వరలోనే 50 కోట్ల రూపాయల క్లబ్‌ చేరడం ఖాయంగా కనిపిస్తున్నది.