ట్రేడ్ టాక్ :సేమ్ సిట్యువేషన్ కంటిన్యూ...

క్రితం వారంలో బుజ్జిగాడు, పార్ధు సినిమాలు మాత్రమే రిలీజయ్యాయి. ప్రభాస్ హీరోగా పూరీజగన్నాధ్ తీర్చిదిద్దిన ఈ సినిమా 'బుజ్జిగాడు...వట్టి నసగాడు' అన్న టాక్ ని తెచ్చుకుని మార్నింగ్ షోకే బ్లాక్ వాళ్ళు టిక్కట్లు అమ్ముకోలేని స్థితికి తీసుకొచ్చి వారి పొట్ట కొట్టింది. ఇక లారెన్స్ నటించి, దర్శక పర్యవేక్షణ చేసిన సినిమా 'పార్ధు'. తల్లి సెంటుమెంటుతో వచ్చిన తన సినిమా అందరినీ కన్నీరు పెట్టిస్తుందని ప్రెస్ మీట్ లలో చెపుతున్నాడు. ప్రేక్షకులు కూడా "లారెన్స్ చెప్పింది కరెక్టే! ఈ సినిమా కెందుకు వచ్చామురా అని కన్నీరు మున్నీరవుతున్నాం వేసవిలో ఏ.సి.ని కూడా ఎంజాయ్ చెయ్యలేని సిట్యువేషన్ వస్తోంది" అని మొత్తుకుంటున్నారు.

ఇక అంతకు ముందు రిలీజయిన 'కంత్రి, పరుగు' అలాగే ఉన్నాయి. నిర్మాతలే తమకింత కలెక్షన్ వచ్చిందని ప్రకటనలు ఇస్తున్నారు. 'గమ్యం' వందరోజుల పండుగ వైపు దూసుకుపోతోంది. 'భలే దొంగలు', 'కాళిదాసు' ,'జల్సా' అలాగే వాటి రేంజిలో నెట్టుకొస్తున్నాయి. ఉన్నవాటిల్లో మొదట వచ్చిన టాక్ కి భిన్నంగా 'బతుకమ్మ,ఎర్ర సముద్రం' కలెక్షన్లు తమ పట్టైన బి.సి.సెంటర్లలలో పుంజుకున్నాయి. తాజాగా రిలీజైన 'పాండురంగడు' ఫరవాలేదనిపించుకుంది. పై వాటితో ప్రేక్షకుడు పోల్చి చూసుకుని హిట్ టాక్ తెచ్చినా ఆశ్చర్యపోవక్కర్లేదు.