Sankranthiki Vasthunam Box Office : అటు అజిత్.. ఇటు చైతూ.. టఫ్‌ ఫైట్‌లోనూ కుమ్మేసిన వెంకటేష్ , ఎన్ని కోట్లంటే?

విక్టరీ వెంకటేష్ - అనిల్ రావిపూడి కాంబోలో వచ్చిన సంక్రాంతికి వస్తున్నాం బ్లాక్ బస్టర్‌గా నిలిచిన సంగతి తెలిసిందే. సంక్రాంతి కానుకగా జనవరి 14 విడుదలైన ఈ ఫ్యామిలీ ఎంటర్‌టైనర్ కేవలం మూడు వారాల్లోనే రూ.300 కోట్లకు పైగా గ్రాస్ వసూళ్లను సాధించింది. కుటుంబ ప్రేక్షకుల ఆదరణతో క్లాస్, మాస్ సెంటర్స్‌లో దుమ్ముదులిపేస్తోంది ఈ చిత్రం. ఈ వారం రెండు పెద్ద సినిమాలు రిలీజ్ కావడంతో వెంకటేష్ జోరు తగ్గింది. మరి సంక్రాంతికి వస్తున్నాం సినిమా 26వ రోజు ఎన్ని కోట్లు రాబట్టిందో చూస్తే :

సంక్రాంతికి వస్తున్నాంలో వెంకటేష్ సరసన ఐశ్వర్య రాజేష్, మీనాక్షి చౌదరిలు హీరోయిన్లుగా నటించగా.. వీకే నరేష్, వీటీవీ గణేష్, మురళీధర్ గౌడ్, సాయికుమార్ తదితరులు కీలకపాత్రలు పోషించారు. నటీనటుల రెమ్యునరేషన్‌, ప్రమోషనల్ ఖర్చులతో కలిపి ఈ సినిమాను దాదాపు 80 కోట్ల రూపాయల బడ్జెట్‌తో శ్రీ వెంకటేశ్వర క్రియేషన్స్ బ్యానర్‌పై ప్రముఖ నిర్మాత దిల్‌రాజు నిర్మించారు.

ఇక ప్రీ రిలీజ్ బిజినెస్ విషయానికి వస్తే.. దాదాపు 42 కోట్లుగా జరిగింది. ఆంధ్రా, నైజాంలో కలిపి 33 కోట్ల రూపాయలు, ఇతర రాష్ట్రాలు, ఓవర్సీస్ కలిపి 9 కోట్ల రూపాయలుగా నమోదైంది. అలా ప్రపంచవ్యాప్తంగా సంక్రాంతికి వస్తున్నాం సినిమాకు మొత్తంగా 42 కోట్ల రూపాయల మేర ప్రీ రిలీజ్ బిజినెస్ జరిగింది. దాదాపు 85 కోట్ల రూపాయలు బ్రేక్ ఈవెన్ టార్గెట్‌గా నిర్దేశించారు ట్రేడ్ పండితులు. మూడు రోజుల్లోనే లాభాల్లోకి వచ్చిన సంక్రాంతికి వస్తున్నాం సినిమా నాటి నుంచి నేటి వరకు రూ. 150 కోట్లకు పైగా లాభాలను పంచి పెట్టి చాలా రోజుల తర్వాత డిస్ట్రిబ్యూటర్లకు పండగను తీసుకొచ్చింది.

ఇకపోతే.. 25 రోజుల వరకు నైజాంలో రూ.41.66 కోట్లు, సీడెడ్‌లో రూ.18.59 కోట్లు, ఉత్తరాంధ్రలో రూ.22.03 కోట్లు, ఈస్ట్ గోదావరిలో రూ.13.58 కోట్లు, వెస్ట్ గోదావరిలో రూ. 8.83 కోట్లు, గుంటూరులో రూ.10.29 కోట్లు, కృష్ణాలో రూ.9.51 కోట్లు, నెల్లూరులో రూ. 4.69 కోట్లు చొప్పున మొత్తంగా తెలుగు రాష్ట్రాల్లో రూ. 129.18 కోట్ల షేర్ రాబట్టింది. కర్ణాటక + రెస్టాఫ్ ఇండియాలో రూ.8.82 కోట్లు, ఓవర్సీస్‌లో రూ. 16.84 కోట్లు అందుకుంది. తెలుగు రాష్ట్రాల్లో రూ.209.05 కోట్ల గ్రాస్ అందుకోగా ప్రపంచవ్యాప్తంగా రూ.154.84 కోట్ల షేర్‌ను రాబట్టింది.

దాదాపు 24 రోజుల వరకు రోజుకు రూ. కోటి తగ్గకుండా షేర్ రాబట్టిన సంక్రాంతికి వస్తున్నాంకు గత రెండ్రోజులుగా కలెక్షన్స్ పడిపోయాయి. కోలీవుడ్ స్టార్ హీరో అజిత్ నటించిన పట్టుదల ఫిబ్రవరి 6న , ఇక ఫిబ్రవరి 7వ తేదీ అక్కినేని నాగచైతన్య - సాయిపల్లవిల తండేల్ విడుదల అయ్యాయి. ఈ సినిమాల ప్రభావం వెంకటేష్ సినిమాపై పడినట్లుగా కనిపిస్తోంది. అయితే వీకెండ్ నాడు మాత్రం సంక్రాంతికి వస్తున్నాం చిత్రం జూలు విదిల్చింది.

కుటుంబ ప్రేక్షకుల నుంచి మంచి రెస్పాన్స్ రావడంతో 26వ రోజు ప్రపంచవ్యాప్తంగా ఏకంగా రూ. 1.36 కోట్ల గ్రాస్ వసూళ్లను రాబట్టి తనకు తిరుగులేదని నిరూపించాడు వెంకటేష్. ఆదివారం కూడా ఇదే స్థాయిలో సంక్రాంతికి వస్తున్నాం సినిమాకు వసూళ్లు వస్తాయని ట్రేడ్ పండితులు అంచనా వేస్తున్నారు. చూద్దాం మరి వెంకటేష్ ఎలాంటి మేజిక్ చేస్తాడో?