Varasudu Official Collections: 5వ రోజు ఊహించని వసూళ్లు.. అన్ని వందల కోట్లతో హవా.. లాభాలు రావాలంటే!

వారసుడుగా వచ్చేసిన విజయ్

ఇళయదళపతి విజయ్ నటించిన తాజా సినిమానే 'వారసుడు'. వంశీ పైడిపల్లి తెరకెక్కించిన ఈ మూవీలో రష్మిక మందన్నా హీరోయిన్‌గా నటించింది. దీన్ని శ్రీ వెంకటేశ్వర క్రియేషన్స్, పీవీపీ బ్యానర్లపై దిల్ రాజు, శిరీష్ నిర్మించారు. ఇందులో శరత్‌కుమార్, ప్రభు, ప్రకాశ్ రాజ్, కుస్భూ, జయసుధ తదితరులు కీలక పాత్రలు చేశారు. ఈ చిత్రానికి ఎస్ థమన్ సంగీతం అందించాడు.

విజయ్ మూవీ బిజినెస్ డీటేల్స్

తమిళ స్టార్ హీరో విజయ్ మార్కెట్‌తో పాటు 'వారసుడు' లేదా 'వారిసు' మూవీపై నెలకొన్న అంచనాలకు అనుగుణంగా.. ఈ సినిమా హక్కుల కోసం ప్రపంచ వ్యాప్తంగా తీవ్ర స్థాయిలో పోటీ ఏర్పడింది. ఫలితంగా భారీ ధరలకు ఈ రైట్స్‌ను కొనుగోలు చేసుకున్నారు. ఇలా ఈ చిత్రం ప్రపంచ వ్యాప్తంగా అన్ని ఏరియాలను కలుపుకుని రూ. 137.90 కోట్లు బిజినెస్‌ను జరుపుకుంది.

5వ రోజు తెలుగు కలెక్షన్లు ఇలా

'వారసుడు' చిత్రానికి తెలుగు రాష్ట్రాల్లో ఐదో రోజు మంచి స్పందనే వచ్చింది. ఫలితంగా నైజాంలో రూ. 35 లక్షలు, సీడెడ్‌లో రూ. 21 లక్షలు, ఉత్తరాంధ్రాలో రూ. 24 లక్షలు, ఈస్ట్‌లో రూ. 13 లక్షలు, వెస్ట్‌లో రూ. 7 లక్షలు, గుంటూరులో రూ. 9 లక్షలు, కృష్ణాలో రూ. 10 లక్షలు, నెల్లూరులో రూ. 6 లక్షలతో కలిపి రూ. 1.25 కోట్లు షేర్, రూ. 2.00 కోట్లు గ్రాస్ వసూలు అయింది.

5 రోజులకూ కలిపి ఎంతంటే?

5 రోజుల్లో 'వారసుడు' చిత్రానికి తెలుగు రాష్ట్రాల్లో కలెక్షన్లు భారీగానే వచ్చాయి. ఫలితంగా నైజాంలో రూ. 4.67 కోట్లు, సీడెడ్‌లో రూ. 1.87 కోట్లు, ఉత్తరాంధ్రాలో రూ. 1.80 కోట్లు, ఈస్ట్‌లో రూ. 91 లక్షలు, వెస్ట్‌లో రూ. 70 లక్షలు, గుంటూరులో రూ. 83 లక్షలు, కృష్ణాలో రూ. 84 లక్షలు, నెల్లూరులో రూ. 58 లక్షలతో కలిపి రూ. 12.15 కోట్లు షేర్, రూ. 22.25 కోట్లు గ్రాస్ వసూలు అయింది.

ప్రపంచ వ్యాప్తంగా ఎంతొచ్చింది

కుటుంబ కథా నేపథ్యంతో రూపొందిన 'వారిసు' మూవీ తమిళ వెర్షన్ జనవరి 11న విడుదలైంది. విజయ్ నటించిన ఈ సినిమాకు 8వ రోజు ప్రపంచ వ్యాప్తంగా రూ. 11.50 కోట్లుకు పైగా గ్రాస్ వసూలైంది. ఇలా ఎనిమిది రోజులకు కలిపి ఈ చిత్రం వరల్డ్ వైడ్‌గా రూ. 225.50 కోట్లు గ్రాస్‌తో పాటు రూ. 114.25 కోట్లు షేర్‌ను రాబట్టింది. దీంతో పలు రికార్డులు కూడా నమోదయ్యాయి.

హిట్ అవ్వాలంటే ఎంత రావాలి

విజయ్ నటించిన 'వారసుడు' మూవీకి అంచనాలకు అనుగుణంగానే రూ. 139 కోట్లు టార్గెట్‌తో వచ్చింది. ఇది 8 రోజుల్లో రూ. 114.25 కోట్లు రాబట్టింది. అంటే.. మరో రూ. 24.75 కోట్లు వస్తేనే ఇది క్లీన్ హిట్ అవుతుంది. ఇక, తెలుగులో దీనికి రూ. 14 కోట్లు బిజినెస్ జరిగింది. అంటే 15 కోట్ల టార్గెట్‌కు ఇంకా రూ. 2.85 కోట్లు వసూలు చేయాల్సి ఉంటుంది.