తమ్ముడి కోసం విజయ్ దేవరకొండ ఇంత త్యాగం చేశాడా?

రెండో సినిమా షురూ

‘దొరసాని' ఫలితంతో జోష్ మీద ఉన్న ఆనంద్ దేవరకొండ.. మరో సినిమాను పట్టాలెక్కించడానికి సిద్ధం అవుతున్నాడు. భ‌వ్య క్రియేష‌న్స్ బ్యాన‌ర్‌పై ఈ సినిమా తెరకెక్కనుందని తెలుస్తోంది. ఈ సినిమా ద్వారా వినోద్ అనే నూతన దర్శకుడు తెలుగు చిత్ర సీమకు పరిచయం అవుతున్నాడట. దీనికి సంబంధించిన చర్చలు పూర్తయ్యాయని, త్వరలోనే అధికారికంగా షూటింగ్ ప్రారంభం కానుందని తెలుస్తోంది.

తమ్ముడి కోసం విజయ్ త్యాగం

తొలి సినిమానే అయినా విమర్శకుల నుంచి ప్రశంసలు అందుకున్న తన తమ్ముడి కోసం విజయ్ దేవరకొండ త్యాగం చేశాడన్న వార్త ప్రస్తుతం ఫిలింనగర్ వర్గాల్లో హల్‌చల్ చేస్తోంది. దీని ప్రకారం.. మొదట ఈ సినిమా కథ విజయ్ దగ్గరకు వెళ్లిందట. చిత్ర దర్శకుడు వినోద్ చెప్పిన ఈ స్టోరీ అతడికి బాగా నచ్చడంతో వెంటనే ఓకే చేసేశాడని తెలిసింది. కానీ, తమ్ముడి కోసం దాన్ని వదులుకున్నాడని వినికిడి.

కథలో కొన్ని మార్పులు

ఈ సినిమా నుంచి తాను తప్పుకుంటున్నట్లు విజయ్ దేవరకొండ నిర్మాతలకు తేల్చి చెప్పేశాడట. అదే సమయంలో తన తమ్ముడు నటిస్తాడని కూడా వెల్లడించాడట. దీంతో దర్శకుడు ఈ స్టోరీలో కొన్ని మార్పులు చేయాలని భావిస్తున్నట్లు గుసగుసలు వినిపిస్తున్నాయి. విజయ్ స్థాయిలో హీరోయిజం పండించలేడనే కారణంతోనే ఈ మార్పులు చేయబోతున్నట్లు విశ్వసనీయంగా తెలుస్తోంది.

‘దొరసాని'కి సహకరించకపోయినా..

ఆనంద్ దేవరకొండ చేసిన దొరసానికి తన సహకారం ఏమీ లేదని విజయ్ దేవరకొండ గతంలోనూ స్పష్టం చేశాడు. ఆ చిత్ర ప్రీ రిలీజ్ ఈవెంట్‌లో దీనిపై క్లారిటీ కూడా ఇచ్చేశాడు. ‘‘యాక్టింగ్ అంటే మాట‌లు కాదు.. స‌డెన్‌గా వ‌చ్చి చేస్తానంటే ఎలా చేస్తావు. మ‌జాక్ అనుకున్నావా? అన్నాను. వాడు ఫిక్స్ అయిపోయున్నాడు కాబ‌ట్టి నేనేమీ చెప్ప‌లేదు. అయితే నీ సినిమా గురించి నన్నేమీ అడ‌క్కు అని అన్నాను. ఆరోజు నుండి నేను కూడా సినిమా గురించి ఏమీ మాట్లాడ‌లేదు'' అని అతడు చెప్పుకొచ్చాడు.