చిరంజీవితో హిందీ రీమేకా?

ఇటీవల జరిగిన ముంబయి బాంబు పేలుళ్ళపై చిరంజీవి సరిగా స్పందించలేదని విమర్శలు వచ్చాయని..వాటిని సినీ మాధ్యమం ద్వారా తిప్పికొట్టబోతున్నారనే వార్త ఫిల్మ్ సర్కిల్సా లో చక్కర్లు కొడుతోంది. బాలీవుడ్ సూపర్ హిట్ వెడ్నస్ డే సినిమాని ఆయన తనదైన శైలిలో రీమేక్ చేయించి దానిలో ప్రధాన పాత్ర అయిన నశీరుద్దీన్ షా పాత్రను చిరంజీవికొద్దిపాటి మార్పులుతో చేయనున్నారని చెపుతున్నారు. అలాగే అనుపమ ఖేర్ చేసిన పోలీస్ ఆఫీసర్ పాత్రలో శ్రీహరి కనిపించనున్నారని తెలుస్తోంది. అంతేగాక చిరు తమ్ముడు పవన్ కళ్యాణ్ ఓ గెస్ట్ పాత్రలో కనపడి అందరిని అలరిస్తాడని చెప్పుకుంటున్నారు.

అయితే ఆ సినిమా రైట్స్ గల యూటీవీ వారు మాత్రం కమల్ హాసన్,ముమ్మట్టిలతో ఈ సినిమా తమిళ,తెలుగు భాషల్లో చేయటానికి సన్నాహాలు చేస్తున్నారని మరో సమాచారం. ఇదంతా ఇలా ఉంటే జెడీ దర్శకత్వంలో ఈ సినిమా హోమం నిర్మాత నిర్మించనున్నాడని ఆ మధ్య ఓ వార్త వచ్చింది. దాన్ని యూ టీవీ వారు కూడా ఖండించారు. ఇక ఈ సినిమాకి చిరంజీవి ఎందుకు చేయాలన్న దానికి ఓ భిన్నమైన వాదన వినపడుతోంది.

అయినా ఈ రీమేక్ పై వచ్చినన్ని వార్తలు,గాసిప్స్ ఈ మధ్య కాలంలో ఏ రీమేక్ పై రాలేదు. ఇక ఎన్నికలు దగ్గరపడుతున్న ఈ తరుణంలో చిరంజీవి మళ్ళీ నటుడుగా చేస్తాడా...అంటే ఇది ఓ పార్టీ ప్రచార చిత్రంగా ఉపయోగించుకోవచ్చునన్న సమాధానం వినపడుతోంది. అలాగే చిరంజీవి చేస్తాడంటున్న నసీరుద్దీన్ షా పాత్ర ఒకే బిల్డింగ్ పై ఎక్కువ సేపు ఉండటంతో షూటింగ్ కి ఎక్కువ కాలం అవసరం లేదని అందుకే చిరంజీవి ఒప్పుకుంటారని అంతా భావిస్తున్నారు.