రాజమౌళి ‘ఈగ’ విడుదల తేదీ ఖరారు

ప్రముఖ దర్శకుడు రాజమౌళి దర్శకత్వంలో ఈ సారి ఓ విభిన్నమైన చిత్రం రూపొందుతున్న సంగతి తెలిసిందే. 'ఈగ' టైటిల్‌తో సైన్స్ ఫిక్షన్ ఫాంటసీ మూవీగా రూపొందుతున్న ఈచిత్రం విడుదలకు సిద్దం అయింది. తాజాగా 'ఈగ' యూనిట్ నుంచి విశ్వసనీయంగా అందిన సమాచారం ప్రకారం ఈ చిత్రాన్ని ఏప్రిల్ 12వ తేదీన విడుదల చేసేందుకు ఏర్పాట్లు చేస్తున్నట్లు సమాచారం. తెలుగు, తమిళంలో ఒకే సారి అత్యధిక థియేటర్లలో ఈ చిత్రాన్ని విడుదల చేసేందుకు నిర్మాతలు ట్రై చేస్తున్నారు. రాజమౌళి దర్శకత్వం వహిస్తుండటం, భారీ సాంకేతిక విలువలతో రూపొందుతున్న ఈ చిత్రంపై ఇప్పటికే హై ఎక్స్‌పెక్టేషన్స్ ఉన్నాయి. నాని, సమంత, కన్నడ నటుడు సుధీప్ ఈ చిత్రంలో ముఖ్య పాత్రలు పోషిస్తున్నారు. కీరవాణి సంగీతం అందించిన ఈ చిత్ర ఆడియో త్వరలోనే విడుదల కాబోతోంది.

ఎన్నో అద్భుతాలను ఆవిష్కరిస్తూ రూపొందుతున్న ఈ చిత్రం శాటిలైట్ రైట్స్‌ను ఓ ప్రముఖ ఎంటర్‌టైన్మెంట్ మీడియా సంస్థ భారీ మొత్తం చెల్లించి సొంతం చేసుకునేందుకు ప్రయత్నిస్తున్నట్లు తెలుస్తోంది. సినీ వర్గాల నుంచి వినిపిస్తున్న సమాచారం ప్రకారం సదరు సంస్థ ఇందుకోసం రూ. 5.5 కోట్లు చెల్లించేందుకు సిద్ధంగా ఉన్నట్లు సమాచారం.