పవన్ కళ్యాణ్‌ను కలిసిన గద్దర్, సీన్లోకి దిల్‌రాజు?

By Bojja Kumar

| Published: Thursday, March 6, 2014, 15:32 [IST]

హైదరాబాద్: ప్రముఖ ప్రజాగాయకుడు, తెలంగాణ ఉద్యమకారుడు గద్దర్ పవర్ స్టార్ పవన్ కళ్యాణ్‌ను కలిసినట్లు వార్తలు వినిపిస్తున్నాయి. ఓ వైపు పవన్ కళ్యాణ్ రాజకీయ తెరంగ్రేటం చేయబోతున్నారని హాట్ హాట్‌గా చర్చసాగుతున్న నేపథ్యంలో గద్దర్-పవన్ కలిసారనే వార్త మరింత ప్రాధాన్యత సంతరించుకుంది.

అయితే సినీ వర్గాల నుండి అందుతున్న సమాచారం ప్రకారం.....పవన్-గద్దర్ కలవడం వెనక ఎలాంటి రాజకీయ కారణం లేదని తెలుస్తోంది. ఓ సినిమా ప్రాజెక్టులో భాగంగానే వీరిద్దరు కలిసారని అంటున్నారు. తెలంగాణ ప్రాంతానికి చెందిన ఓ పోరాట యోధుడిపై దిల్ రాజు సినిమా ప్లాన్ చేస్తున్నారని, ఈ చిత్రానికి సంబంధించిన స్క్రిప్టు డెవలప్‌మెంటులో గద్దర్ కీ రోల్ పోషిస్తున్నారని టాక్.

దిల్ రాజు కోరిక మేరకు ఈ సినిమాకు సంబంధించిన స్క్రిప్టును పవన్ కళ్యాణ్‌కు వినిపించేందుకు గద్దర్ వెళ్లి పవన్ కళ్యాణ్ కలిసారని అంటున్నారు. పవన్ కళ్యాణ్ ఒప్పుకుంటే ఈ సినిమా ఆయనతో తీసేందుకు దిల్ రాజు ప్లాన్ చేస్తున్నారట. 'జన గన మన' అనే టైటిల్‌తో ఈ సినిమా ప్లాన్ చేస్తున్నారట. అయితే ఇదంతా ఫిల్మ్ నగర్ వర్గాల నుండి అందుతున్న అనధికారిక సమాచారం మాత్రమే.

పవన్ కళ్యాన్ గురించి ఇతర విషయాల్లకి వెళితే...ప్రస్తుతం ఆయన సంపత్ నంది దర్శకత్వంలో గబ్బర్ సింగ్-2 చిత్రంతో పాటు, హిందీ సూపర్ హిట్ మూవీ 'ఓ మై గాడ్' చిత్రానికి రీమేక్‌గా తెరకెక్కుతున్న చిత్రాలు చేయడానికి కమిట్ అయ్యారు. త్వరలో ఈ చిత్రాలకు సంబంధించిన రెగ్యులర్ షూటింగ్ ప్రారంభం కానుంది.