వాటిపై ఓ కన్నేసిన ఎన్టీఆర్.. RRR పూర్తయిన వెంటనే! ముదిరిన టాక్..

వాటిపై కన్నేసిన ఎన్టీఆర్

ప్రస్తుతం ఎన్టీఆర్ RRR సినిమా షూటింగ్‌లో బిజీగా ఉన్నారు. దర్శకధీరుడు రాజమౌళి దర్శకత్వంలో తెరకెక్కుతున్న ఈ సినిమాలో ఎన్టీఆర్‌తో పాటు రామ్ చరణ్ కూడా నటిస్తుండటం ప్రేక్షకలోకంలో ఆసక్తి నింపింది. శరవేగంగా షూటింగ్ జరుపుకుంటున్న ఈ సినిమా 2020 జూలై 30న విడుదలకు సిద్ధమవుతోంది. ఈ నేపథ్యంలో తన తదుపరి ప్రాజెక్ట్స్‌పై ఇప్పటినుంచే ఓ కన్నేశారట ఎన్టీఆర్.

ఏ మాత్రం విరామం లేకుండా ఎన్టీఆర్

RRR సినిమా పూర్తికాగానే ఏ మాత్రం విరామం లేకుండా వరుసగా సినిమాలు చేయాలని ఎన్టీఆర్ ఫిక్స్ అయ్యారట. ఈ మేరకు తనతో సినిమాలు చేయాలనుకుంటున్న డైరెక్టర్లతో కూడా రెగ్యులర్ టచ్‌లో ఉంటూ సినీ విశేషాలు చర్చిస్తున్నారని టాక్. ఎన్టీఆర్ కోసం ఇప్పటికే ముగ్గురు టాప్ డైరెక్టర్లు కథలు సిద్ధం చేశారట. ఆ ముగ్గురే త్రివిక్రమ్ శ్రీనివాస్, ప్రశాంత్ నీల్, కొరటాల శివ.

మొదట త్రివిక్రమ్ శ్రీనివాస్ ఆ వెంటనే..

RRR పూర్తయిన వెంటనే మాటల మాంత్రికుడు త్రివిక్రమ్ శ్రీనివాస్ దర్శకత్వంలో తెరకెక్కనున్న సినిమాలో ఎన్టీఆర్ నటించనున్నారట. ఈ సినిమా పూర్తిగా త్రివిక్రమ్ స్టైల్లోనే ఉంటుందని తెలుస్తోంది. ఆ తర్వాత `కేజీఎఫ్` డైరెక్టర్ ప్రశాంత్ నీల్ సినిమా మొదలవుతుందట. ప్రశాంత్ నీల్- ఎన్టీఆర్ కాంబోలో రాబోయే ఈ సినిమా హై బడ్జెట్ యాక్షన్ మూవీ అని తెలుస్తోంది.

ఎన్టీఆర్ దూకుడు

ఇక ఈ రెండు సినిమాలు ఫినిష్ అయిన తర్వాత కొరటాల శివ సినిమా ప్రారంభమవుతుందని తెలుస్తోంది. ఈ లోగా చిరంజీవితో కొరటాల శివ తన సినిమా పూర్తిచేసి మరో సినిమాకు కమిట్ కాకుండా ఎన్టీఆర్ కోసం బలమైన కథ సిద్ధం చేస్తారట. అంటే ఈ లెక్కన్న RRR పూర్తికాగానే ఎన్టీఆర్ దూకుడు మామూలుగా ఉండదన్నమాట.