హోమ్

గాసిప్స్

మెగా ఫ్యామిలీ నుంచి గత సంవత్సరం మరో హీరో వచ్చిన విషయం తెలిసిందే. ఆయన మెగాస్టార్ చిరంజీవి చిన్న అల్లుడు కల్యాణ్ దేవ్. చిరు చిన్న కూతురు శ్రీజ భర్తే ఈ కల్యాణ్ దేవ్. చిరు అల్లుడిగా పరిచయం అయినప్పటికీ, ఆ ముద్ర పడకుండా తనకంటూ గుర్తింపు తెచ్చుకోవాలనే లక్ష్యంతో సినీ రంగంలోకి అడుగు పెట్టాడు. ఈ క్రమంలోనే 'విజేత' అనే సినిమాతో ప్రేక్షకుల ముందుకు వచ్చాడు. రాకేష్ శశి దర్శకత్వంలో తెరకెక్కిన ఈ చిత్రంలో కళ్యాణ్ దేవ్ సరసన మాళవిక నాయర్ నటించింది.

గతంలో చిరంజీవి ఎవర్‌గ్రీన్ మూవీ టైటిల్‌ను పెట్టడంతో పాటు ఏకంగా మెగాస్టారే ఈ సినిమా కోసం ప్రమోషన్ కార్యక్రమాలు చేపట్టడంతో, 'విజేత' భారీ విజయం సాధిస్తుందని అంతా అనుకున్నారు. అయితే, ఈ సినిమా ఆశించిన స్థాయిలో ఆడలేదు. అలాగే, కల్యాణ్ దేవ్ లుక్స్ పరంగా ఆకట్టుకున్నప్పటికీ, నటనలో కొంత మెరుగు పడాలని సినీ విశ్లేషకులు అభిప్రాయపడ్డారు. ఈ సినిమా నిరాశకు గురి చేయడంతో ఈ సారి ఎలాగైనా హిట్ కొట్టాలనే పట్టుదలతో కల్యాణ్ మరో సినిమాకు సంతకం చేశాడు.

ప్ర‌స్తుతం పులి వాసు అనే కొత్త ద‌ర్శ‌కుడితో సినిమా చేస్తున్నాడు క‌ళ్యాణ్. రిజ్వాన్ ఎంటర్టైన్మెంట్స్ ఈ చిత్రాన్ని నిర్మిస్తోంది. ఈ సినిమాతో ఎలాగైనా మంచి హీరోగా గుర్తింపు తెచ్చుకోవాలని అనుకున్నాడు. అందుకు అనుగుణంగా ఈ సినిమా షూటింగ్ ప్రారంభం అయింది. షూటింగ్ కూడా దాదాపుగా పూర్తయింది. ఇలాంటి సమయంలో మెగా అభిమానులకు షాక్‌కు గురి చేసే వార్త ఒకటి బయటకు వచ్చింది.

అదే.. కల్యాణ్ దేవ్ సినిమా ఆగిపోయిందనే వార్త. షూటింగ్ ముగిసే సమయానికి ఈ సినిమా రషెష్ చూసిన హీరో.. దీనిపై సంతృప్తిగా లేడట. దీంతో దర్శకుడికి సినిమా ఆపేయమని చెప్పాడని ఓ వార్త ఫిలింనగర్ వర్గాల్లో హల్‌చల్ చేస్తోంది. దీంతో మెగా అభిమానులు నిరాశ చెందుతున్నారు. ఈ సినిమాలో నరేష్, రాజేంద్ర ప్రసాద్, పోసాని లాంటి సీనియర్ నటులు నటించారు.