‘మొగుడు’రాక మరింత ఆలస్యం?

By Bojja Kumar

Published: Wednesday, October 26, 2011, 18:26 [IST]

గోపీచంద్, తాప్సీ జంటగా క్రియేటివ్ డైరెక్టర్ కృష్ణ వంశీ దర్శకత్వంలో రూపొందుతున్న 'మొగుడు" సినిమా నవంబర్ 4న విడుదల చేయాలని తొలుత నిర్ణయించినప్పటికీ....సినిమా విడుదల మరో వారం రోజులు వాయిదా పడ్డట్లు తెలుస్తూంది. పోస్టు ప్రొడక్షన్ పనులు పూర్తికానందున నవంబర్ 11న విడుదల చేసేందుకు రంగం సిధ్దం చేస్తున్నట్లు యూనిట్ వర్గాల సమాచారం. ఇదే రోజున దిల్ రాజు-సిద్ధార్థ 'ఓ మై ఫ్రెండ్" సినిమా విడుదలవుతోంది.

గోపీచంద్‌, తాప్సీ ప్రధాన పాత్రధారులు కాగా... శ్రద్ధాదాస్‌ మరో హీరోయిన్ గా చేస్తున్న ఈ చిత్రంలో రాజేంద్రప్రసాద్‌ ఓ కీలక పాత్ర పోషిస్తున్నారు. మెడలో మూడుముళ్లు వేసిన ప్రతి ఒక్కడూ మొగుడు కాలేడు. తనని నమ్మి వచ్చిన మగువ మనసు గెలుచుకున్నవాడే నిజమైన మొగుడు.. మగాడు. ఈ విషయాన్నే కృష్ణవంశీ తనదైన శైలిలో తెరకెక్కించారట. అలకలు, అల్లర్లు, అందాలు, బంధాలు, భావాలు, భావోద్వేగాలు, సరసాలు, సంప్రదాయాలు వెరసి కృష్ణ వంశీ సినిమా. 'మురారి"గా మురిపించినా, 'చందమామ"లోని చల్లని వెన్నెలను ధియేటర్లలో కురిపించినా అది కృష్ణవంశీకే చెల్లింది. మరి గోపీచంద్ ను మొగుడి ఎలా చూపించబోతున్నాడో తెలియాలంటే సినిమా విడుదల వరకు ఆగాల్సిందే. ఈ చిత్రానికి కెమెరా : శ్రీకాంత్, సమర్పణ : బేబీ భవ్య, నిర్మాణ : లక్ష్మి నరసింహా ప్రొడక్షన్స్.

More from Filmibeat