దిల్ రాజుపై నాగ్ అసంతృప్తి

By Staff

| Published: Tuesday, September 15, 2009, 15:14 [IST]

తన తనయుడు నాగచైతన్యను తీసుకెళ్లి దిల్ రాజు చేతిలో పెట్టినందుకు నాగార్జున ఇప్పుడు తీరిగ్గా బాధపడుతున్నాడు. తొలుత తమ సొంత బ్యానర్ 'అన్నపూర్ణ స్టుడియోస్' ద్వారా చైతన్యను పరిచయం చెయ్యాలనుకున్న నాగార్జున, ఆ అవకాశం 'దిల్' రాజు అడిగిందే తడవుగా మరో ఆలోచన లేకుండా ఒప్పుకున్నాడు. దీనికి కారణం దిల్ రాజు పై వున్న నమ్మకమే. ఇంత వరకూ అపజయమే ఎరుగని రారాజుగా వున్న 'దిల్' రాజుకు 'జోష్' చిత్రం తొలి సారిగా అపజయం అంటే ఎలా వుంటుందో రుచి చూపించింది.

ఎన్నో అంచనాల మధ్య వచ్చిన ఈ చిత్రం అంచనాలను అందుకోలేక చతికిలపడింది. ఎప్పుడూ కూల్ గా కనిపించే నాగ్ 'జోష్' చిత్రం విడుదలకు ముందు ఎన్నో నిద్రలేని రాత్రులు గడిపానని తనే చెప్పుకున్నాడు. కానీ ఈ చిత్రం తప్పక విజయవంతం అవుతుందన్న నమ్మకంతో వున్నాడు. ఇప్పుడీ ఫలితం కాస్త వ్యతిరేకంగా వుండటంతో జీర్ణించుకోలేకపోతున్నాడు. చైతన్యను అనవసరంగా 'దిల్' రాజు చేతిలో పెట్టాను అని వాపోతున్నాడట. ఇందులో తప్పు పూర్తిగా రాజుది కాకపోయినా ఆయన కూడా ఈ పరిణామాల పై బాధపడుతున్నాడట. అయినా చేతులు కాలాకా ఆకులు పట్టుకొంటే ఏం లాభం.