RC 15: సంక్రాంతి రేసు నుంచి అవుట్.. భారీగా ప్లాన్ చేసిన దిల్ రాజు.. రిలీజ్ ఎప్పుడంటే?

శంకర్ దర్శకత్వంలో

రామ్ చరణ్ తేజ ప్రస్తుతానికి శంకర్ దర్శకత్వంలో తన 15వ సినిమా చేస్తున్నాడు. భారీ బడ్జెట్ తో దిల్ రాజు నిర్మిస్తున్న ఈ సినిమాలో కియారా అద్వానీ హీరోయిన్ గా నటిస్తోంది. శ్రీకాంత్, అంజలి, జయరాం వంటి వారి ఇతర కీలక పాత్రల్లో నటిస్తున్న ఈ సినిమాలో రామ్ చరణ్ ద్విపాత్రాభినయం చేస్తున్నారు అని కొన్నిసార్లు, త్రిపాత్రాభినయం చేస్తున్నాడని కొన్నిసార్లు ప్రచారం జరుగుతూ వచ్చింది.

సంక్రాంతి రేసు నుంచి అవుట్

అయితే ప్రస్తుతానికి ఈ సినిమా షూటింగ్ అమృత్ సర్లో జరుగుతోంది. రామ్ చరణ్ కూడా తన పాత్రకు సంబంధించిన కొంతమేర షూటింగ్ పూర్తి చేసి అమృత్సర్ నుంచి హైదరాబాద్ తిరిగి వచ్చారు. అది పూర్తి అయ్యాక వైజాగ్ లో ఒక షెడ్యూల్ షూటింగ్ ప్రారంభమయ్యే అవకాశం ఉందని తెలుస్తోంది. తాజాగా జరుగుతున్న ప్రచారం మేరకు ఈ సినిమా సంక్రాంతి రేసు నుంచి తప్పుకునే అవకాశం ఉందని అంటున్నారు.

అదే నెలలో

ఈ సినిమాని ముందుగా సంక్రాంతి సందర్భంగా విడుదల చేస్తానని దిల్ రాజు ప్రకటించారు కానీ ఇప్పుడు సినిమా సంక్రాంతికి విడుదల చేయడం కంటే మార్చి నెలాఖరులో విడుదల చేయడం బాగుంటుందని భావిస్తున్నట్లు సమాచారం. దానికి కారణం రామ్ చరణ్ కెరీర్ లో భారీ బ్లాక్ బస్టర్ హిట్లుగా నిలిచిన రంగస్థలం, ఆర్ఆర్ఆర్ సినిమాలు అదే నెలలో విడుదల కావడం.

సగభాగం

అంతేకాక ఈ సినిమా విడుదల చేయాలనుకుంటున్నా మార్చి 30వ తేదీ నుంచి వచ్చే నెల అంటే ఏప్రిల్ 9వ తేదీ లోపు సుమారు 7 రోజులపాటు సెలవులు ఉంటాయట. దానికి తగ్గట్లు అప్పుడే పిల్లల పరీక్షలు కూడా పూర్తవుతాయి కాబట్టి ఇవన్నీ తమ సినిమా కలెక్షన్స్ పెరిగేందుకు దోహదం అవుతాయని నిర్మాత దిల్ రాజు భావిస్తున్నట్లు సమాచారం. ప్రస్తుతానికి ఈ సినిమా షూటింగ్ సగభాగం పూర్తయిందని అంటున్నారు.

గౌతమ్ తిన్ననూరి డైరెక్షన్లో

ఈ షూటింగ్ మొత్తాన్ని అక్టోబర్ కల్లా పూర్తి చేసి జనవరి కి ఫస్ట్ కాపీ సిద్ధం చేసుకునేలా ప్రణాళికలు సిద్ధం చేస్తున్నట్లు ప్రచారం జరుగుతోంది. ఇక ఈ సినిమా పూర్తయిన తరువాత రామ్ చరణ్ గౌతమ్ తిన్ననూరి డైరెక్షన్లో ఒక సినిమా చేయడానికి రంగం సిద్ధం చేసుకుంటున్నారు. ఈ సినిమా గురించి అధికారికంగా ప్రకటన రాలేదు కానీ దాదాపు ఖరారు అయినట్టే అని అంటున్నారు. మరి ఇది అధికారికం అవుతుందో లేక మరో సినిమా తెర మీదకు వస్తుందో చూడాలి.