మరో మల్టీస్టారర్‌ను లైన్‌లో పెట్టిన నాగార్జున: చైతూ, అఖిల్ ఔట్.. డ్రీమ్ ప్రాజెక్టులో ఊహించని హీరోలు!

అందులో నిరాశ.. ఇందులో సూపర్‌గా

రాహుల్ రవీంద్రన్ దర్శకత్వంలో అక్కినేని నాగార్జున నటించిన చిత్రం 'మన్మథుడు 2'. ఎన్నో అంచనాల నడుమ విడుదలైన ఈ సినిమా బాక్సాఫీస్ ముందు బోల్తా కొట్టింది. దీంతో నాగ్ కెరీర్‌లోనే ఓ డిజాస్టర్ మూవీగా నిలిచిపోయింది. ఈ మూవీతో నిరాశ పరిచినప్పటికీ.. బిగ్ బాస్ షోతో మాత్రం నాగ్ అదరగొట్టేశాడు. అందులో హోస్టుగా రాణించిన ఆయన ఎన్నో రికార్డులను బద్దలు కొట్టాడు.

పోలీస్ స్టోరీతో రాబోతున్న నాగార్జున

నాగార్జున తాజా చిత్రం 'వైల్డ్ డాగ్'. నూతన దర్శకుడు సోలోమన్ దర్శకత్వం తెరకెక్కించిన ఈ సినిమాలో ఆయన ఏఎన్ఐ ఆఫీసర్‌గా నటించాడు. మ్యాట్నీ ఎంటర్‌టైన్‌మెంట్ బ్యానర్‌పై నిరంజన్ రెడ్డి, అన్వేష్ రెడ్డి సంయుక్తంగా నిర్మిస్తున్నారు. ఇందులో దియా మిర్జా, సయామీ కేర్, అతుల్ కులకర్ణీ, అలీ రేజా తదితరులు నటిస్తున్నారు. త్వరలోనే ఈ మూవీ విడుదల కాబోతుంది.

డ్రీమ్ ప్రాజెక్టును మొదలెట్టనున్నాడు

అక్కినేని నాగార్జున - కల్యాణ్ కృష్ణ కాంబినేషన్‌లో వచ్చిన చిత్రం 'సోగ్గాడే చిన్ని నాయన'. రెండేళ్ల క్రితం సంక్రాంతి కానుకగా విడుదలైన ఈ సినిమా భారీ విజయాన్ని అందుకుంది. కలెక్షన్ల పరంగానూ దుమ్ము దులిపేసింది. ఈ సినిమాకు 'బంగార్రాజు' అనే టైటిల్‌తో ప్రీక్వెల్‌ను రూపొందించబోతున్నారు. త్వరలోనే నాగార్జున డ్రీమ్ ప్రాజెక్టు పట్టాలెక్కబోతున్నట్లు తెలుస్తోంది.

‘బంగార్రాజు'లో మరో అక్కినేని హీరో

'బంగార్రాజు' మూవీ కోసం కల్యాణ్ కృష్ణ ఎప్పుడో స్క్రిప్ట్ వర్క్ మొదలు పెట్టేశాడు. దీంతో ఈ సినిమా ఎప్పుడో ప్రారంభం అవుతుందని అంతా అనుకున్నారు. కానీ, పలు కారణాల వల్ల ఈ ప్రాజెక్టు పట్టాలెక్కలేదు. ఇటీవలే ఈ మూవీ మ్యూజిక్ సిట్టింగ్స్ కూడా పూర్తయ్యాయి. ఇక, ఇందులో అఖిల్ కానీ, నాగ చైతన్య కానీ నటించాల్సి ఉంది. ఈ విషయాన్ని వాళ్లే పలుమార్లు చెప్పారు.

ఈ సినిమా నుంచి చైతూ, అఖిల్ ఔట్

అఖిల్ ఈ సినిమాలో నటిస్తాడని అప్పట్లో ప్రచారం జరిగినా.. ఆ తర్వాత అతడు చేయడం లేదని క్లారిటీ వచ్చేసింది. కానీ, నాగ చైతన్య మాత్రం ఈ సినిమాలో నటిస్తున్నట్లు స్వయంగా చెప్పాడు. 'నాన్న, నేను 'బంగార్రాజు'లో నటించాల్సి ఉంది. నా కోసం స్క్రిప్టులో మార్పులు చేస్తున్నారు' అని ఓ ఇంటర్వ్యూలో వెల్లడించాడు. అయితే, ఇప్పుడు అతడు కూడా దీని నుంచి తప్పుకున్నాడట.

డ్రీమ్ ప్రాజెక్టులో ఊహించని హీరోలు!

కొడుకులు ఇద్దరూ వాళ్ల వాళ్ల సినిమాలతో ఫుల్ బిజీగా ఉండడంతో.. 'బంగార్రాజు'లో మరో హీరోను తీసుకోవాలని నాగార్జున భావిస్తున్నాడట. ఇందుకోసం ఎనర్జిటిక్ స్టార్ రామ్ పోతినేనితో చర్చలు జరపబోతున్నాడని తెలుస్తోంది. అతడు ఓకే అనని పక్షంలో యంగ్ హీరో నాగశౌర్యను తీసుకోవడానికి సిద్ధంగా ఉన్నట్లు ప్రచారం జరుగుతోంది. మొత్తానికి ఇది మల్టీస్టారర్‌గానే రాబోతుంది.