రవితేజ 'కిక్ 2' ఎప్పటినుంచంటే...

By Srikanya

Published: Tuesday, March 11, 2014, 9:40 [IST]

హైదరాబాద్ :కిక్ చిత్రం రవితేజ కెరీర్ కు కిక్ ఇచ్చింది. అప్పటివరకూ ఓ రకంగా నడుస్తున్న రవితేజ కెరీర్ కిక్ తో మరింత విజృంభించింది. రవితేజ, ఇలియానా కాంబినేషన్లో సురేంద్రరెడ్డి రూపొందించిన ఈ చిత్రానికి సీక్వెల్ రెడీ అవుతోంది. ఈ సీక్వెల్ లోనూ రవితేజ హీరోగా చేస్తున్నారు. మరో హీరో కళ్యాణ్ రామ్ నిర్మిస్తున్నారు. ఎన్టీఆర్ ఆర్ట్స్ బ్యానర్ పై ఈ చిత్రం రూపొందుతుంది. 2014 జూన్ నెలలో ఈ చిత్రం ప్రారంభం కానుందని సమాచారం. తమన్ ఈ చిత్రానికి సంగీతం అందించనున్నారు. ఆ చిత్రానికి పనిచేసిన సాంకేతిక నిపుణులనే ఈ చిత్రానికి తీసుకోనున్నారు.

ఇప్పటికే స్క్రిప్టు వర్క్ పూర్తై పోయిందని త్వరలోనే భారీగా ఓపినింగ్ జరుగుతుందని చెప్తున్నారు. ఇక ఈ సీక్వెల్ లో కేవలం క్యారెక్టరైజేషన్ కంటిన్యూ అవుతుందని అంటున్నారు. అందులో హీరో పోలీస్ ఆఫీసర్ అయిన తర్వాత కిక్ సినిమా ముగుస్తుంది. కాబట్టి సీక్వెల్ లో పోలీస్ పాత్ర ఉంటుందని తెలుస్తోంది. ఇక హీరోయిన్ గా ఎవరనేది ఫైనల్ కాలేదు. అలాగే బ్రహ్మానందం హల్వా రాజ్ పాత్ర కొత్త మెలికతో అదరకొడుతుందని అంటున్నారు. అయితే ఈ కథలో మంచి లవ్ స్టోరి ఉండేలా తయారు చేస్తున్నారని సమాచారం.

ప్రస్తుతం రవితేజ హీరోగా రాక్‌లైన్ ఎంటర్‌టైన్‌మెంట్స్ ప్రైవేట్ లిమిటెడ్ పతాకంపై కె.ఎస్.రవీంద్రనాధ్ (బాబి) దర్శకత్వంలో రాక్‌లైన్ వెంకటేష్ 'పవర్' చిత్రాన్ని రూపొందిస్తున్నారు. రెగ్యులర్ షూటింగ్ జరుపుకుంటున్న దీనికి 'అన్ లిమెటెడ్' అనే ట్యాగ్ లైన్ ని పెడుతున్నారు. టైటిల్ కి తగ్గట్లు రవితేజ పూర్తి పవర్ ని ఈ చిత్రం చూపెడుతుందని చెప్తున్నారు. ఈ చిత్రంలో పోలీస్ గా రవితేజ కనిపించనున్నారు. ప్రస్తుతం హైదరాబాద్ లో షూటింగ్ జరుగుతోంది.

'బలుపు' చిత్రం నుండి బాబితో తాను ప్రయాణమవుతున్నానని, ఓ మంచి కథ చెప్పడంతో ఈ సినిమా ప్రారంభిస్తున్నామని రవితేజ తెలిపారు. మ్యూజికల్‌గా ఈ చిత్రం సూపర్‌హిట్ స్థాయిలో ఉంటుందని, రవితేజ, నిర్మాత తనపై పెట్టుకున్న నమ్మకాన్ని నిలబెట్టుకుంటానని, నిర్మాతతోపాటు మంచి యూనిట్ దొరికినందుకు ఆనందంగా ఉందని దర్శకుడు బాబి తెలిపారు.

నిర్మాత రాక్ లైన్ వెంకటేష్ మాట్లాడుతూ- తాను నిర్మిస్తున్న స్ట్రెయిట్ తొలి తెలుగు చిత్రం ఇదేనని, నాలుగేండ్లుగా రవితేజతో చిత్రం నిర్మించాలని ప్రయత్నాలు చేస్తున్నామని, బాబి చెప్పిన కథ నచ్చడంతో చాలా తక్కువ సమయంలో నిర్మాణం చేపట్టామని తెలిపారు. విక్రమార్కుడు స్టైల్లో రవితేజ ప్రేక్షకులను ఈ చిత్రంలో అలరిస్తారని, ప్రతి సంవత్సరంలో తెలుగులో ఒక చిత్రం నిర్మించడానికి సన్నాహాలు చేస్తున్నామని ఆయన తెలిపారు.

హన్సిక తొలిసారిగా రవితేజతో హీరోయిన్ గా నటిస్తున్న ఈ చిత్రంలో బ్రహ్మానందం, పరుచూరి వెంకటేశ్వరరావు, బ్రహ్మాజీ, పోసాని కృష్ణమురళి, ముఖేష్ రుషి, రావూ రమేష్, సంపత్, సుబ్బరాజు, సప్తగిరి, సురేఖావాణి, జోగి బ్రదర్స్ తదితరులు నటిస్తున్నారు. సంగీతం:ఎస్.ఎస్.తమన్, కెమెరా:ఆర్థర్ ఎ.విల్సన్, ఎడిటింగ్:గౌతమ్‌రాజు, మాటలు:కోన వెంకట్, నిర్మాత:రాక్‌లైన్ వెంకటేష్, కథ, దర్శకత్వం:కె.ఎస్.రవీంద్రనాధ్ (బాబి).

More from Filmibeat