నందమూరి హీరోల పాలిట విలన్‌గా చిన్న నంబీ.. ఎన్టీఆర్ తర్వాత బాలయ్యే టార్గెట్

వరుసగా 'అఖండ', 'వీర సింహా రెడ్డి', 'భగవంత్ కేసరి' వంటి బ్లాక్ బస్టర్ హిట్లను అందుకుని ఫుల్ ఫామ్‌తో దూసుకుపోతోన్నారు నటసింహా నందమూరి బాలకృష్ణ. ఈ ఉత్సాహంలోనే ఆయన మరిన్ని కొత్త ప్రాజెక్టులను లైన్‌లో పెట్టుకుంటున్నారు. ఇలా ఇప్పుడు ఈ సీనియర్ స్టార్ హీరో.. కేఎస్ రవీంద్ర అలియాస్ బాబీ దర్శకత్వంలో తన 109వ సినిమాను చేస్తున్నారు.

నందమూరి బాలకృష్ణ హీరోగా బాబీ తెరకెక్కిస్తోన్న ఈ చిత్రం 1980 దశకం నాటి కథతో రూపొందబోతున్నట్లు ఇటీవలే వచ్చిన పోస్టర్ల ద్వారా అర్థం అయింది. దీంతో ఈ చిత్రంపై అంచనాలు భారీ స్థాయిలో పెరగ్గా.. దీనికి ఏమాత్రం తీసిపోని విధంగా ఈ సినిమాను తీస్తున్నారు. ముఖ్యంగా ఈ మూవీలో బాలయ్య మేకోవర్ డిఫరెంట్‌గా ఉండేలా ప్లాన్ చేస్తున్నారనే టాక్ వినిపిస్తోంది.

యాక్షన్ అండ్ డ్రామాతో ఎంతో ప్రతిష్టాత్మకంగా రూపొందుతోన్న ఈ సినిమాకు సంబంధించిన రెగ్యూలర్ షూటింగ్‌ను కొద్ది రోజుల క్రితమే మొదలు పెట్టారు. ఇందులో యాక్షన్ సీక్వెన్స్ షూట్ చేశారు. ఆ తర్వాత మూవీ యూనిట్ రాజస్థాన్‌తో పాటు చాలా ప్రాంతాలకు వెళ్లి మరీ చిత్రీకరణ జరిపింది. ఇప్పుడు ఈ మూవీ షూటింగ్ రామోజీ ఫిల్మ్ సిటీలో కొనసాగుతున్నట్లు తెలిసింది.

బాలయ్య - బాబీ కలిసి చేస్తున్న ఈ చిత్రంలో విలన్‌గా ఎవరు నటిస్తారన్న దానిపై ఎన్నో రకాల ప్రచారాలు తెరపైకి వచ్చాయి. ఈ క్రమంలోనే బాలీవుడ్ స్టార్ హీరో బాబీ డియోల్ ఆ పాత్రను చేస్తున్నట్లు చిత్ర యూనిట్ వెల్లడించింది. ఈ క్రమంలోనే ఈ ప్రతిష్టాత్మక చిత్రంలో మరో విలన్ పాత్ర కూడా ఉన్నట్లు తాజాగా ఓ న్యూస్ ఫిలిం నగర్‌లో చక్కర్లు కొడుతోంది.

బాలయ్య సినిమాలో సెకెండ్ విలన్ పాత్ర కోసం దసరా మూవీ ఫేం షైన్ టామ్ చాకో‌‌ను తీసుకున్నట్లు తాజాగా ఓ న్యూస్ లీకైంది. ఈయన ఇందులో ఓ డిఫరెంట్ నెగెటివ్ రోల్‌ను చేస్తున్నట్లు తెలిసింది. ముఖ్యంగా బాలయ్య - షైన్ టామ్ చాకో మధ్యన వచ్చే సన్నివేశాలు హైలైట్‌గా ఉండబోతున్నాయట. ఇదిలా ఉండగా.. ఈ మలయాళ నటుడు ఇప్పటికే 'దేవర'లో విలన్‌గా చేస్తున్న విషయం తెలిసిందే. ఇలా నందమూరి హీరోలకు అతడు విలన్‌గా మారిపోయాడు.

ఇదిలా ఉండగా.. పక్కా కమర్షియల్ ఎంటర్‌టైనర్‌గా రాబోతున్న ఈ సినిమాను సితారా ఎంటర్‌టైన్‌మెంట్స్, ఫార్చన్ ఫోర్ సినిమాస్, శ్రీకర స్టూడియోస్ బ్యానర్లపై సాయి సౌజన్య, నాగ వంశీ సంయుక్తంగా నిర్మిస్తున్నారు. ఇందులో శ్రద్దా శ్రీనాథ్, మీనాక్షి చౌదరి హీరోయిన్లుగా నటిస్తున్నట్లు వార్తలు వస్తున్నాయి. దీనికి థమన్ మ్యూజిక్ ఇస్తున్నాడు.