నెత్తిన పెట్టుకుంటే చిన్నచూపా?: 'నయన్'పై తెలుగు ఫ్యాన్స్ హర్ట్ అయ్యారట..

ఇంతకీ నయనతార ఏమన్నారు:

ఇటీవల ఓ ఇంటర్వ్యూలో నయనతారను మీ అభిమాన నటుడు ఎవరు? అని ప్రశ్నించగా.. మరో మాట లేకుండా కోలీవుడ్‌ హీరోలు అజిత్‌, విజయ్‌లు అని చెప్పేసింది. ఈ మాటే కొంతమంది తెలుగు అభిమానులకు నచ్చలేదట. ఏం.. నయనతార తెలుగులో సినిమాలు చేయలేదా?.. ఇక్కడివాళ్లలో ఒక్క అభిమాన హీరో కూడా లేరా? అని ప్రశ్నిస్తున్నారట.

నెత్తినపెట్టుకున్నామని..:

కోలీవుడ్‌లో ఆమె సూపర్ స్టార్ స్థాయికి ఎదగకముందే.. టాలీవుడ్ ఆమెను నెత్తినపెట్టుకుందని సదరు అభిమానులు గుర్తుచేస్తున్నారట. టాలీవుడ్ నయనతారకు ఇంత చేస్తే.. ఇక్కడ హీరోల గురించి మాత్రం ఆమె ప్రస్తావించకపోవడమేంటనేది వారి ఆవేదన.

అనవసర రాద్దాంతం:

అభిమానుల ఆవేదన సంగతి ఎలా ఉన్నా.. వ్యక్తిగత అభిప్రాయాలను కూడా గౌరవించకపోతే ఎలా అన్న ప్రశ్న కూడా వ్యక్తమవుతోంది. నయనతార తన అభిమాన నటులెవరో చెప్పడం.. టాలీవుడ్‌ను తక్కువ చేయడం ఎలా అవుతుందనేది మరికొందరి ప్రశ్న. అనవసరంగా లేనిపోనివి ఊహించుకుని ఇలాంటి రాద్దాంతం చేస్తున్నారనేవారు లేకపోలేదు.

టాలీవుడ్‌లో 'నయన్'...:

అభిమానుల గోల ఎలా ఉన్నా.. టాలీవుడ్ మాత్రం నయనతారకు చాలానే చేసింది. 'శ్రీరామ రాజ్యం' తరువాత అందరూ ఆమెను తెలుగు సీతమ్మ అంటూ గౌరవించారు. 'జైసింహా' కోసం అత్యధిక పారితోషికం అడిగినా వెనుకాడలేదు. ఆమె పెట్టిన కండిషన్స్‌కు కూడా ఒప్పుకున్నారు. నయనతారను ఇంతలా గౌరవిస్తున్న టాలీవుడ్ లో ఆమెకు ఒక్క అభిమాన హీరో కూడా లేడా? అనేది కొంతమంది ఆవేదన.

చిన్నచూపా?:

ఇంకొంతమంది నయనతారకు టాలీవుడ్ అంటే చిన్నచూపు కాబట్టే.. కోలీవుడ్ హీరోల పేర్లు మాత్రమే చెప్పిందంటున్నారు. టాలీవుడ్ నటులు కూడా ఇష్టమేనని ఒక మాట చెబితే సరిపోయేది కదా అంటున్నారు. అయినా అభిమాన హీరోలు కోలీవుడ్ అయినంత మాత్రానా.. టాలీవుడ్ అంటే చిన్న చూపా? అనుకోవడం లేనిపోనివి ఆపాదించుకోవడమే అవుతుంది తప్ప.. ఆ విషయాన్ని నయనతారకే వదిలేస్తే ఇంత గొడవ ఉండదు కదా అనేది కూడా గమనించాల్సిన విషయం.