Vijay Devarakonda: లైగర్ ఫ్లాప్.. రెమ్యునరేషన్​లో భారీ మొత్తం ఇచ్చేసిన విజయ్​ దేవరకొండ

నెగెటివ్​ టాక్​..

లైగర్​ మూవీని ప్రముఖ బాలీవుడ్​ సినీ నిర్మాణ సంస్థ ధర్మ ప్రొడక్షన్స్, పూరీ కనెక్ట్ బ్యానర్స్‌పై పూరీ జగన్నాథ్, ఛార్మీ, కరణ్ జోహర్ సంయుక్తంగా నిర్మించారు. ఈ సినిమా మిక్స్​డ్​ మార్షల్​ ఆర్ట్స్​ నేపథ్యంలో తెరకెక్కిన విషయం తెలిసిందే. అత్యంత భారీ అంచనాల మధ్య పాన్​ ఇండియా మూవీగా ఆగస్టు 25న విడుదలైంది లైగర్​ చిత్రం. రిలీజైన తొలి రోజు నుంచే మూవీపై నెగెటివ్​ టాక్​ వచ్చింది. ఈ మూవీపై ఒక్కొక్కరు ఒక్కోలా స్పందించారు. పూరి జగన్నాథ్​పై విమర్శలు సైతం వచ్చాయి.

రూ. 200 కోట్లు వసూలు చేస్తుందని..

అయితే లైగర్ మూవీకి అడ్వాన్స్ బుకింగ్స్ బాగానే జరిగినా.. విడుదల తర్వాత సీన్​ మారిపోయింది. ఈ మూవీ విడుదలకు ముందు రూ. 200 కోట్లకు పైగా వసూలు చేస్తుందని ఆశపడ్డ విజయ్​ దేవరకొండ ఆశలు తలకిందులయ్యాయి. అన్ని భాషల్లోనూ లైగర్ డిజాస్టర్​ టాక్​ తెచ్చుకోవడంతో మూవీ నిర్మాతలకు పెద్ద ఎత్తున నష్టాలను మిగిల్చిందని సినీ విశ్లేషకులు అంటున్నారు. అయితే ఈ మూవీ నిర్మాతల్లో ఛార్మీతోపాటు బాలీవుడ్ దర్శక నిర్మాత అయిన కరణ్​ జోహార్ ఒకరు. పూరి జగన్నాథ్ కూడా ఓ నిర్మాతగా వ్యవహరించాడు. లైగర్ పరాజయంతో పూరీ జగన్నాథ్​ తన పారితోషికంతోపాటు లాభాల్లో వచ్చిన తన వాటాలో 70శాతం వెనక్కి ఇచ్చేశాడని సమాచారం.

పూరి బాటలో విజయ్​ దేవరకొండ..

ఇక ఇదే బాటలో విజయ్​ దేవరకొండ కూడా వెళ్లినట్లు తెలుస్తోంది. లైగర్​ చిత్రానికి విజయ్ దేవరకొండ రూ. 35 కోట్ల పారితోషికం అందుకున్నాడని ఇప్పటికే వార్తలు వినిపించాయి. దీంతోపాటు నాన్​ థియేట్రికల్​ రైట్స్​లో విజయ్​కు సైతం వాటా ఉందని సమాచారం. ఇప్పుడు ఆ వాటాను వద్దని పూరీ, ఛార్మీలకు చెప్పడమే కాకుండా తన పారితోషికంలో రూ. 6 కోట్లను వెనక్కి ఇచ్చేసినట్లు టాలీవుడ్ ఇండస్ట్రీలో గుసగుసలు వినిపిస్తున్నాయి. ఈ విషయం తెలిసిన విజయ్ ఫ్యాన్స్​ అతనిపై ప్రశంసలు కురిపిస్తున్నారట. నష్టాల్లో ఉన్న నిర్మాతలను ఆదుకున్న రియల్​ హీరో అని కొనియాడుతున్నారట.