మణిరత్నంకు హీరో ఝలక్.. డేట్స్ కష్టమనడంతో సినిమా నుంచి అవుట్!

మణిరత్నం తదుపరి చిత్రంలో

మణిరత్నం, విజయ్ సేతుపతి కాంబినేషన్‌లో నవాబు వచ్చిన సంగతి తెలిసిందే. ఆ చిత్రంలో బరువైన, ఫెర్ఫార్మెన్స్‌కు వీలున్న పాత్రలో విజయ్ సేతుపతి నటించి మెప్పించాడు. అయితే నవాబు తర్వాత మణిరత్నం తమిళంలో పన్నియిన్ సెల్వన్ అనే చిత్రాన్ని ప్లాన్ చేస్తున్నారు. ఆ సినిమా ప్రస్తుతం ప్రీ ప్రొడక్షన్ స్థాయిలోనే ఉంది.

పొన్నియిన్ సెల్వన్‌లో విజయ్ సేతుపతి పేరు

పొన్నియిన్ సెల్వన్ సినిమాలో ఓ కీలకమైన పాత్ర కోసం విజయ్ సేతుపతిని సంప్రదించారని వార్త తమిళ చిత్ర పరిశ్రమలో కొద్దిరోజుల క్రితం వైరల్ అయింది. అయితే తాజాగా విజయ్ సేతుపతిని మణిరత్నం తన సినిమాకు సంబంధించి నటీనటులు జాబితా నుంచి తొలగించడం చర్చనీయాంశమైంది. అయితే ఆ నిర్ణయం వెనుక కారణం ఇలా వినిపిస్తున్నది.

మణిరత్నం ఆఫర్‌కు నో చెప్పడంతో

విజయ్ సేతుపతి క్షణం తీరిక లేకుండా ప్రస్తుతం పలు ప్రాజెక్టుల్లో నటిస్తున్నారు. ఈ క్రమంలో మణిరత్నం తన సినిమా కోసం సుమారు 200 రోజుల షెడ్యూల్‌ను వేసుకొన్నారట. ఆ షెడ్యూల్‌ కోసం విజయ్ సేతుపతిని సంప్రదించగా అందుకు ఆయన చేతులెత్తేశారట. దాంతో విజయ్ సేతుపతిని తీసుకోవాలనే నిర్ణయాన్ని మణిరత్నం ఉపసంహరించుకొన్నారట.

సూపర్ డీలక్స్‌లో ట్రాన్స్‌జెండర్‌గా విజయ్ సేతుపతి

విజయ్ సేతుపతి తాజాగా నటించిన సూపర్ డీలక్స్ మంచి టాక్‌ను సొంతం చేసుకొన్నది. ఈ చిత్రంలో ఆయన పోషించిన ట్రాన్స్ జెండర్ పాత్రకు మంచి రెస్పాన్స్ వస్తున్నది. ఈ పాత్రలో ఒదిగిపోయారని ప్రేక్షకులు, సినీ విమర్శకులు ప్రశంసల వర్షం కురిపిస్తున్నారు.