సూర్య ‘సెవెంత్ సెన్స్’కధ ఇదే

ఇప్పుడు ఎక్కడ విన్నా సూర్య తాజా చిత్రం సెవెంత్ సెన్స్ పైనే చర్చలు. ఈ చిత్రంలో కథ ఏమిటి..ఎలా ఉండబోతోంది అనేదే హాట్ టాపిక్. దానికి మురగదాస్ కొద్దిగా క్లూలు ఇస్తూ కథని రివిల్ చేస్తున్నాడు. ఆయన మాటల్లోనే..ఈ రోజు ఏం జరుగుతుందో ఈ రోజే మీకు తెలిసిపోతే ఎలా ఉంటుంది..భలే ఉంటుంది. లక్కి లాటరీ ఏ నెంబరుకు తగలుతుందో ముందే పట్టేయవచ్చు. ఒక్క రోజులోనే కోటీశ్వరుడు కావచ్చు. కానీ వాస్తవంగా ఆలోచిస్తే ..కంటి మీద కునుకు ఉండదు. భవిష్యత్ ఏంటో తెలియనంత వరకే జీవితం ప్రశాంతంగా ఉంటుంది. రేపటి సన్నివేశం ఈ రోజు కళ్ళముందు కనపడితే అల్లకల్లోలమే..సిక్స్ సెన్స్ తో జరగబోయేదేమిటో ఊహించేయగలం. మరి అందుకు మరో అడుగు ముందుకు వేస్తే ఎలా ఉంటుంది. ఆ వ్యక్తి జీవితంలో ఎదురయ్యే మార్పులేంటి..ఇవన్నీ చూపించబోతున్నాం. మనమింత వరకూ చూడని ఒక అవతారం ఒకటుంది. అదేమిటి..మనిషి జీవిత గమ్యాన్ని అదెలా మారుస్తుంది..అనే అంశం చుట్టూ ఆలోచించి అల్లిన కథ అని దర్శకుడు చెప్తున్నారు. సైన్స్ కీ,మానవ నాగరకతకీ కొన్ని నమ్మకాలుకూ ముడివేసే ఈ కథలో సూర్య కొత్త అవతారంలో కనిపించనున్నాడు.

కాగా 'గజిని" చిత్రంలో షార్ట్ టర్మ్ మెమోరీలాస్ పేషెంట్‌గా నటించి విమర్శకుల ప్రశంసలందుకున్న సూర్య ఈ చిత్రంలో సైంటిస్ట్ గా, బౌద్ధ సన్యాసిగా, సర్కస్ కళాకారుడిగా మూడు విభిన్నమైన పాత్రల్లో కనిపించబోతున్నాడు. అయితే ఈ మూడు పాత్రల్లో ఒకటైన బౌద్ధ సన్యాసిగా సూర్య నటించిన పాత్ర ఈ చిత్రానికి ప్రధాన ఆకర్షణ కానుందని, ఈ పాత్ర నిడివి ఇరవై నిమిషాలు మాత్రమే ఉంటుందని కోలీవుడ్ సమాచారం. అలాగే సర్కస్ కళాకారుడిగా నటించిన సూర్య ఈ పాత్ర కోసం వియాత్నాంలో కుంగ్‌ఫూకు సంబంధించి ప్రత్యేకంగా శిక్షణ తీసుకుని నటించాడట. ఈ చిత్రాన్ని లక్ష్మీగణపతి ఫిలింస్ పతాకంపై బి. సుబ్రహ్మణ్యం తెలుగులో అందించబోతున్నాడు.