శృతి హరిహరన్‌కు అర్జున్ షాక్.. నాకు ఓ కూతురు ఉందని.. ఆమెతో అలా ప్రవర్తించలే..

జీర్ణించుకోలేకపోతున్నాను

నాపై లైంగిక ఆరోపణలు రావడం నాకు షాక్ గురిచేసింది. తను చేసిన ఆరోపణలను జీర్ణించుకోలేకపోతున్నాను. ఆమె చేసిన వ్యాఖ్యలపై నేను స్పందించకపోతే తప్పు చేసిన వాడిని అవుతాను. అందుకే వాటిపై వివరణ ఇవ్వడానికి మీడియా ముందుకొచ్చాను అని అర్జున్ తెలిపారు.

నేను అలాంటి సీన్లలో

సినీ పరిశ్రమలో సుదీర్ఘమైన అనుభవం ఉన్నందున్న డైరెక్టర్లు, నిర్మాతలు నన్ను కొన్ని సీన్లు షూట్ చేసేటప్పుడు సలహాలు అడుగుతుంటారు. కొన్నిసార్లు నేను సూచించినట్టు వారు చేస్తారు. లేకపోతే వారికి నచ్చినట్టు తీస్తారు. కొన్నిసార్లు నేను ఇంటిమేట్ సీన్లలో నటించడానికి మొహమాట పడుతుంటాను. సినిమా తప్పనిసరి అయితే అందులో నటిస్తాను అని అర్జున్ చెప్పారు.

అక్కడికి పిలువలేదు

సినిమా షూటింగ్ సందర్భంలో నాకు భోజనం వస్తే నేను అందర్ని ఆహ్వానిస్తుంటాను. నాకు ఏదైనా భోజనం వస్తే శృతిని లంచ్‌కు పిలిచి ఉండొచ్చేమో. కానీ ఆమెను డిన్నర్‌కు పిలువలేదు అని అర్జున్ వెల్లడించారు. ఆమె నా గురించి తప్పుగా అర్ధం చేసుకొని ఉండొచ్చని అన్నారు.

నాకు ఓ కూతురు ఉందని

నాకు ఓ కూతురు ఉంది. ఆమె కూడా సినీ పరిశ్రమలో ఉన్నారు. నటించడానికి సిద్ధపడుతున్నారు. అలాంటి సమయంలో నేను మరో మహిళతో ఎలా అసభ్యంగా బిహేవ్ చేస్తాను. మీ టూ ఉద్యమం రావడం మంచిదే. కానీ దానిని తప్పుదారి పట్టించకూడదు అని అర్జున్ సూచించాడు.