హీరోగా అదృష్టం పరీక్షించుకొంటున్న ప్రముఖ కోరియోగ్రాఫర్.. రాఘవ లారెన్స్ దారిలో..

దక్షిణాదిలో స్టార్ కొరియోగ్రాఫర్‌గా

దక్షిణాది సినీ పరిశ్రమలో జానీ మాస్టర్ చాలా తక్కువ సమయంలోనే స్టార్ కోరియోగ్రాఫర్‌గా పేరు తెచ్చుకొన్నారు. ఆయన డైరెక్షన్ చేసిన డ్యాన్సులు ప్రేక్షకులను విపరీతంగా ఆకట్టుకొన్నాయి. అనతికాలంలోనే తెలుగులో స్టార్ హీరోలకు కొరియోగ్రఫి అందించే అవకాశాలను చేజిక్కించుకొన్నారు.

రౌడీ బేబీ, బుట్ట బొమ్మ పాటలకు

2020లో రికార్డు స్థాయిలో వ్యూస్ సాధించిన పాటలకు కొరియోగ్రఫిని అందించిన డ్యాన్స్ డైరెక్టర్‌గా జానీ మాస్టర్ ఘనతను సాధించారు. రౌడీ బేబీ, బుట్ట బొమ్మ లాంటి పాటలకు జానీ మాస్టర్ దర్శకత్వం వహించిన విషయం తెలిసిందే. ఈ పాటలు యూట్యూబ్, ఇతర సోషల్ మీడియా ఫ్లాట్‌ఫామ్‌లో రికార్డులను తిరగరాసాయి.

టీవీలో రియాలిటీ షోలకు హోస్ట్‌గా

తెలుగు సినీ పరిశ్రమలో డ్యాన్స్ డైరెక్టర్‌గా రాణిస్తూనే టెలివిజన్‌లో పలు డ్యాన్స్, రియాలిటీ షోలకు జడ్జీగా వ్యవహరించారు. తెలుగు, తమిళ, హిందీ, కన్నడ భాషల్లో 150కి పైగా చిత్రాలకు కొరియోగ్రఫిని అందించిన జానీ మాస్టర్ ప్రస్తుతం హీరోగా మరో అవతారంలో కనిపించనున్నారు.

సుజీ విజువల్స్ పతాకంపై రూపొందే చిత్రంలో

సుజీ విజువల్స్ పతాకంపై వెంకట్ రమణ కే నిర్మిస్తున్న ఇంకా పేరు పెట్టని చిత్రంలో జానీ మాస్టర్ హీరోగా నటిస్తున్నారు. ఈ చిత్రానికి మురళి రాజ్ దర్శకత్వం వహిస్తున్నారు. ఇప్పటి వరకు తనదైన శైలిలో హీరోలను, అభిమానులను ఆకట్టుకొన్న జానీ మాస్టర్ హీరోగా కూడా రాణిస్తారని ఆశిద్దాం. బెస్టాఫ్ లక్ జానీ మాస్టర్.