హోమ్

హీరో

తెలుగు సినీ ఇండస్ట్రీలోనే బడా నిర్మాతగా పేరు తెచ్చుకున్న దగ్గుబాటి రామానాయుడు కుటుంబం నుంచి వచ్చి తనకంటూ ప్రత్యేక గుర్తింపును సంపాదించుకున్నాడు యంగ్ హీరో రానా. ఒకవైపు హీరోగా చేసుకుంటూనే.. మరోవైపు 'బాహుబలి'లో విలన్‌గా నటించాడు. ఈ సినిమాతో దేశ వ్యాప్తంగా ఫేమస్ అయిపోయిన ఈ యంగ్ హీరో.. సరికొత్త కథలను ఎంచుకుంటూ ముందుకు వెళ్తున్నాడు. ఈ క్రమంలోనే ప్రయోగాత్మకమైన చిత్రాలకూ గ్రీన్ సిగ్నల్ ఇచ్చేస్తున్నాడు.

ఈ క్రమంలోనే అతడిపై ఎన్నో పుకార్లు షికార్లు చేశాయి. ఫలానా హీరోయిన్‌తో ఎఫైర్ పెట్టుకున్నాడని, ఆ హీరోయిన్‌తో డేటింగ్ చేస్తున్నాడని రానాపై ఎన్నో రూమర్లు వచ్చాయి. అంతేకాదు, ఈ మధ్య అతడు బాగా సన్నబడడంతో ఆరోగ్య సమస్యలు కూడా వచ్చాయని ప్రచారం జరిగింది. కొందరైతే ఈ దగ్గుబాటి వారి అబ్బాయికి కిడ్నీ సమస్య వచ్చిందని, అందుకే బక్క పల్చగా అయిపోయాడని కూడా చెప్పుకున్నారు.

ఈ వార్తలు నిజమేనేమో అనుకున్నంతా టాలీవుడ్‌లో ప్రచారం జరిగింది. ఈ నేపథ్యంలో తనపై వస్తున్న పుకార్లకు పుల్‌స్టాప్ పెట్టాడు రానా. ఇటీవల ప్రముఖ సినీ విమర్శకురాలు అనుపమ చోప్రాకు ఓ ఇంటర్వ్యూ ఇచ్చాడతను. ఆ సమయంలో రానా వ్యక్తిగత జీవితానికి సంబంధించిన ఎన్నో అంశాలపై జవాబులు రాబట్టారామె. ఈ క్రమంలోనే కిడ్నీ సమస్య అంటూ వచ్చిన రూమర్లపైనా రానాను ప్రశ్నించారు.

దీనికి సమాధానంగా ''నేను ప్రస్తుతం 'హాతీ మేరీ సాతీ' అనే సినిమాలో నటిస్తున్నాను. అందులో ముప్పై ఏళ్ల పాటు అడవిలోనే జీవించిన మనిషిగా కనిపించబోతున్నాను. ఆ పాత్రకు న్యాయం చేయడం కోసమే సన్నబడాల్సి వచ్చింది. అంతేకానీ, నాకేమీ ఆరోగ్య సమస్యలు లేవు. ఈ సినిమా షూటింగ్ తర్వాత నేను యథా స్థానానికి వచ్చేస్తాను'' అని చెప్పుకొచ్చాడు. మరి ఇప్పటికైనా రానాపై వస్తున్న పుకార్లకు పుల్‌స్టాప్ పడుతుందో లేదో చూడాలి.