హోమ్

హీరో

మెగా ఫ్యామిలీ నుండి హీరోగా పరిచయమైన హీరో కావడంతో సాయి ధరమ్ తేజ్ వరుస సినిమాల్లో అవకాశాలు దక్కించుకున్నారు. అయితే అందులో విజయాలకంటే అపజయాలే ఎక్కువా ఉన్నాయి. ఈ నేపథ్యంలో తన పుట్టినరోజు సందర్భంగా ఆయన ట్వీట్ పరిశీలిస్తే సక్సెస్ అందుకోవడానికి ఈ మెగా మేనల్లుడు తనలో తాను మేధోమదనం చేసుకుంటున్నట్లు స్పష్టం అవుతోంది. సాయి ధరమ్ తేజ్ అక్టోబర్ 15న 32 వ వసంతంలోకి అడుగు పెడుతున్నాడు.

అత్యంత ప్రియమైన మెగా అభిమానుకు అంతులేని ప్రేమతో రాస్తున్న సందేశం అంటూ ఆయన ఓ సందేశం పోస్టు చేశారు. 'గెలిచినప్పుడు వేలకుపైగా చేతులు చప్పట్లు కొడతాయి. ఓడిపోయినా.. మీ చప్పట్ల చప్పుడు తగ్గకుండా.. జయాపజయాలకు అతీతంగా నన్ను ప్రోత్సహిస్తూ వెన్నంటి ఉన్న అభిమానులకు కృతజ్ఞతలు.' అని వ్యాఖ్యానించారు.

ఈ మధ్య కాలంలో మీ అంచనాలను అందుకోలేకపోయానన్నది వాస్తవం. దానికి కారణాలను విశ్లేషించుకుంటున్నాను. మీ సలహాలు, సూచనలను తీసుకుని చేసిన తప్పులను సరిదిద్దుకుంటూ.. నన్ను నేను కొత్తగా ఆవిష్కరించుకునే ప్రయత్నంలో ఉన్నాను. మీరు నాపై చూపించే ఈ అభిమానమే నన్ను మానసికంగా దృఢంగా ఉంచి మంచి సినిమాలు చేయడానికి ఉత్సాహాన్నిస్తోంది.' అని చెప్పుకొచ్చారు.

సాయి ధరమ్ తేజ్ ఈ ఏడాది నటించిన రెండు చిత్రాలు 'ఇంటిలిజెంట్', 'తేజ్ ఐ లవ్ యూ' బాక్సాఫీసు వద్ద పరాజయం పాలయ్యాయి. ఈ నేపథ్యంలో సినిమాల ఎంపిక విషయంలో తన పంతా మార్చుకోవాలని నిర్ణయించుకున్నట్లు తెలుస్తోంది. సాయి ధరమ్ తేజ్ త్వరలో కిషోర్ తిరుమల దర్శకత్వంలో 'చిత్రలహరి' సినిమా చేయబోతున్నట్లు సమాచారం.