రైతులుగా మారి స్ఫూర్తినింపారు.. శర్వానంద్ పోస్ట్ వైరల్

శర్వానంద్ శ్రీకారం సినిమాకు టాక్ ఎంత బాగా వచ్చిందో అందరికీ తెలిసిందే. అయితే టాక్ వచ్చినంత పాజిటివ్‌గా కలెక్షన్లు మాత్రం రావడం లేదు. కమర్షియల్‌గా ఈ మూవీ బాక్సాఫీస్ వద్ద ఆశించినంతగా ఆడటం లేదని తెలుస్తోంది. ట్రేడ్ వర్గాల లెక్కలు చూస్తుంటే ఈ వారం జాతి రత్నాలు సినిమానే గెలిచేలా ఉంది. శ్రీకారం రెండో స్థానానికే పరిమితమయ్యేలా ఉంది. మొత్తానికి శ్రీకారం మాత్రం ఓ మంచి ప్రయత్నంగా అందరి మన్నలను అందుకుంటోంది.

సామూహిక వ్యవసాయం చేయాలి.. రైతు అని గర్వంగా చెప్పుకునే రోజు రావాలి.. రైతు కొడుకు రైతే కావాలి అనే నినాదాన్ని బాగానే ప్రమోట్ చేశారు. సినిమాలో ఇచ్చిన సందేశాన్ని అందరూ మెచ్చుకుంటున్నారు. అయితే ఈ మెసెజ్ మాత్రం అందరినీ ఆకట్టుకుంది. ఈ మూవీకి స్ఫూర్తిగా నిలిచిన వారు అంటూ కొంతమందిని శర్వానంద్ చూపించాడు. ఓ వీడియో రూపంలో తన సోషల్ మీడియా ఖాతా ద్వారా పోస్ట్ చేశాడు.

అందులో పలు రాష్ట్రాల నుంచి కొందరు వ్యక్తులు వ్యవసాయాన్ని వృత్తిగా ఎంచుకుని రైతులుగా మారారు. సాఫ్ట్ వేర్ ఇంజనీర్లు అయిన వ్యక్తులు రైతులుగా మారి సేద్యం చేశారు. ఈ మేరకు వారందరినీ పరిచయం చేశాడు. నిజ జీవితంలో చదువుకున్న వ్యక్తులు, ఉద్యోగం చేసిన వ్యక్తులు అందరూ కూడా రైతులుగా మారారు. శ్రీకారం సినిమాకు వీరే స్ఫూర్తిదాతలు అంటూ శర్వానంద్ చేసిన వీడియో వైరల్ అవుతోంది.