200 కోట్లు కలెక్ట్ చేస్తే సినిమా హిట్టా? ఓటీటీలో సక్సెస్ ఎలా లెక్కించాలంటే.. మనోజ్ బాజ్‌పేయ్

ఓటీటీలతో థియేటర్లకు ఢోకా ఏమీ లేదు

ఓటీటీలు వచ్చినంత మాత్రాన థియేటర్లకు వచ్చిన ఢోకా ఏమిలేదు. ఒకసారి పరిస్థితులన్నీ సవ్యంగా మారిన తర్వాత థియేటర్లు ఓపెన్ అవుతాయి. ప్రేక్షకులు హాయిగా థియేటర్లకు వెళ్లి సినిమాలను ఎంజాయ్ చేస్తారు. అందులో ఎలాంటి సందేహం లేదు. థియేటర్, ఓటీటీ మధ్య పోటీ ఇంకా పెరుగుతుంది. ఈ రెండు పరిశ్రమల మధ్య గీత గీసి వేర్వేరుగా చూడటం మంచిది కాదు. ఈ రెండింటిలోను నటులు, దర్శకులు పనిచేయడానికి అవకాశం కలుగుతుంది అని మనోజ్ బాజ్‌పేయ్ అన్నారు

100 నుంచి 200 కోట్లు వసూలు చేస్తే

అయితే సినిమా సక్సెస్‌ కొలమానం కేవలం బాక్సాఫీస్.. సినిమాలు సాధించే కొలమానంగా చూడకూడదు. ఏదైనా సినిమా 100 నుంచి 200 కోట్లు వసూలు చేస్తే దానిని సక్సెస్‌గా చూడటం అన్ని సమయాల్లో కుదరదు. ఎందుకంటే సినిమా కోసం పెట్టిన పెట్టుబడి, ఆ సినిమా వల్ల వచ్చిన రాబడిని పోల్చి చూడాలి. పెట్టుబడి కంటే రాబటి ఎక్కువ వస్తే అప్పుడే సక్సెస్‌గా పరిగణించాలి అని మనోజ్ బాజ్‌పేయ్ తెలిపారు.

టాక్ చెప్పేలా ప్రేక్షకుడు తృప్తి పొందాలి

ఏదైనా సినిమా 100 కోట్లు వసూలు చేసిందనే విషయంతో ప్రేక్షకుడు థియేటర్‌కు వెళ్లి పెదవి విరిచిన సందర్బాలు ఎక్కువగానే ఉంటాయి. 100 కోట్లు వచ్చినంత మాత్రాన ప్రేక్షకుడు ఆ సినిమా హిట్ అయిందని చెప్పలేడు. కానీ ఏదైన మంచి మూవీ గానీ, వెబ్ సిరీస్‌ గానీ చూసిన తర్వాత అది బాగుందని ప్రేక్షకుడు ఏ మాత్రం సందేహం లేకుండా తన టాక్‌ను అందరితో పంచుకొంటున్నాడు. దాంతో ఓటీటీలో సినిమాకు మంచి డిమాండ్ ఏర్పడుతున్నది అని మనోజ్ బాజ్‌పేయ్ పేర్కొన్నారు.

ఓటీటీ సక్సెస్‌ను ఎలా చూడాలంటే...

ఓటీటీలో సినిమాలకు ప్రేక్షకుల నుంచి వచ్చే రెస్పాన్స్ బట్టి వాటికి సంబంధించిన సబ్‌స్క్రిప్షన్ పెరుగుతున్నాయి. ఓటీటీ యూజర్లు చెల్లించే సబ్‌స్క్రిప్షన్ వల్ల ఆదాయం పెరుగుతున్నది. దాని వల్ల సినిమాలకు మరింత ఆదాయం ఓటీటీ కంపెనీలకు, నిర్మాతలకు వస్తున్నది. దీనిని ఎందుకు సక్సెస్‌గా భావించకూడదు అని మనోజ్ బాజ్‌పేయ్ పేర్కొన్నారు.

నాకు నచ్చి వెబ్ సిరీస్ ఇవే..

ఓటీటీలో వచ్చిన వెబ్ సిరీస్‌లో నాకు బాగా నచ్చినది ఫార్గో. అలాగే మేడ్ ఇన్ హెవెన్, పాతాల్ లోక్ వెబ్ సిరీస్‌ కూడా బాగా నచ్చాయి. వాటిని నేను ఒక ఆడియెన్ మాదిరిగానే చూశాను. ఏదైనా మంచి మూవీ, వెబ్ సిరీస్ చూస్తే.. వెంటనే దానికి సంబంధించిన యూనిట్ సభ్యులను, యాక్టర్లకు ఫోన్ చేసి అభినందిస్తాను అని మనోజ్ బాజ్‌పేయ్ తెలిపారు.