హోమ్

హీరో

బడా ఫ్యామిలీ నుంచి సినిమాల్లోకి ఎంట్రీ ఇచ్చినా తనకంటూ ప్రత్యేకమైన ఇమేజ్‌ను సొంతం చేసుకున్నాడు మెగా ప్రిన్స్ వరుణ్ తేజ్. సినిమా సినిమాకు వైవిధ్యాన్ని చూపుతూ సూపర్ సక్సెస్ అవుతున్నాడు. ఈ క్రమంలోనే వరుసగా సినిమాలు చేసుకుంటూ దూసుకుపోతున్నాడు. దీంతో స్టార్ హీరోగా ఎదగడంతో పాటు మార్కెట్‌ను కూడా గణనీయంగా పెంచుకున్నాడు. ఇలాంటి పరిస్థితుల్లో ఇటీవల వరుణ్ తేజ్ కరోనా వైరస్ బారిన పడ్డాడు. ఈ విషయాన్ని సోషల్ మీడియా ద్వారా వెల్లడించిన అతడు.. తనకు కొన్ని లక్షణాలు కూడా ఉన్నాయని తెలిపాడు.

కొద్ది రోజుల క్రితం మెగా పవర్ స్టార్ రామ్ చరణ్ కూడా కరోనా పాజిటివ్‌గా తేలాడు. ఆ వెంటనే వరుణ్ కూడా తనకు కరోనా వచ్చినట్లు చెప్పి.. అప్పటి నుంచి సెల్ఫ్ క్యారంటైన్‌లో ఉంటున్నాడు. దీనికి సంబంధించిన అనుభవాలను వివరిస్తూ అప్పుడప్పుడూ సోషల్ మీడియాలో పోస్టులు కూడా పెడుతున్నాడు. ఈ నేపథ్యంలో తనకు కరోనా టెస్టులో నెగటివ్ రిపోర్ట్ వచ్చినట్లు తాజాగా ఓ ట్వీట్ చేశాడు వరుణ్. అంతేకాదు, 'నేనెప్పుడూ ఓ నెగటివ్ రిపోర్టు మనకు ఆనందాన్ని పంచుతుందని అనుకోలేదు' అంటూ ఫన్నీగా రాసుకొచ్చాడు. దీంతో మెగా ఫ్యాన్స్ ఖుషీ అవుతున్నారు.

ఇదిలా ఉండగా, ప్రస్తుతం వరుణ్ తేజ్.. కిరణ్ కొర్రపాటి దర్శకత్వంలో బాక్సింగ్ నేపథ్యంలో ఉన్న సినిమాలో నటిస్తున్నాడు. ఇది ఎప్పుడో పూర్తి కావాల్సి ఉన్నా.. కరోనా లాక్‌డౌన్ వల్ల ఆలస్యం అయింది. ఇది పట్టాలపై ఉండగానే.. 'F3'లో నటిస్తున్నాడు. సంక్రాంతి కానుకగా విడుదలై భారీ విజయాన్ని సొంతం చేసుకున్న మూవీ 'F2'. విక్టరీ వెంకటేష్, వరుణ్ తేజ్, తమన్నా, మెహరీన్ నటించిన ఈ మల్టీ స్టారర్ మూవీని సక్సెస్‌ఫుల్ డైరెక్టర్ అనిల్ రావిపూడి తెరకెక్కించాడు. దిల్ రాజు నిర్మించిన 'F2' భారీ వసూళ్లను రాబట్టి సంక్రాంతి విజేతగా నిలిచిన విషయం తెలిసిందే.