Top 10 Heroines: తెలుగులో టాప్ 10 హీరోయిన్స్ వీళ్లే.. నంబర్ 1 ఎవరో తెలుసా?

ప్రముఖ మీడియా సంస్థ ఆర్మాక్స్ దేశ వ్యాప్తంగా సినీ తారలపై సర్వే నిర్వహిస్తూ ఉంటుంది. తాజాగా డిసెంబర్ 2023కి సంబంధించి టాలీవుడ్​లో ఉన్న టాప్​ 10 హీరోయిన్​లు వీరే అంటూ ఓ లిస్టును రిలీజ్ చేసింది. ఈ జాబితాను ఆర్మాక్స్ తన సోషల్ మీడియా వేదికగా పోస్ట్ చేసింది. ఎప్పటి మాదిరిగానే తన సత్తా చాటుకుంటూ సమంత మొదటి స్థానంలో ఉంటూ తనకు తిరుగులేదనిపించుకుంది. మిగతా హీరోయిన్లు ఎవరు ఏ స్థానంలో వారు నిలిచారో ఈ స్టోరీలో తెలుసుకుందాం.

హీరోలు, హీరోయిన్ల విషయంలో ఎవరూ టాప్​ అనేది ఎప్పటికీ అంతుచిక్కని విషయమే. నువ్వా నేనా అనే రేంజ్​లో హీరో హీరోయిన్ల అభిమానులు మా హీరో తోపు.. మా హీరోయిన్ నెంబర్​ 1 అనుకుంటూ ఫ్యాన్ వార్స్ చేసేసుకుంటారు. సోషల్​ మీడియా వచ్చాక ఈ వార్స్​కి లెక్కే లేదు. ముఖ్యంగా టాలీవుడ్​లో ఈ ఫ్యాన్స్ పంచాయితీ కాస్త ఎక్కువగానే ఉంటుంది. అలాంటి సమయంలో ఎలాంటి వివాదాలకు తావు లేకుండా ఆర్మాక్ మీడియా సంస్థ డిసెంబర్ 2023కు గానూ టాలీవుడ్​లో టాప్​ హీరోయిన్లు వీరే అంటూ ఓ లిస్ట్ విడుదల చేసింది. ప్రతినెల సోషల్ మీడియాలో, జనాల్లో, సినిమాల్లో ఎవరూ టాప్​లో ఉంటారో వారి లిస్ట్ తయారు చేసి ఆర్మాక్స్ రిలీజ్ చేస్తుంది.

ఆర్మాక్స్ రిలీజ్​ చేసిన టాప్ 10 హీరోయిన్ల లిస్ట్​లో టాప్​ 1లో సమంత ఉంది. 2023లో శాకుంతలం, ఖుషి సినిమాలతో తెలుగు ప్రేక్షకుల ముందుకు వచ్చింది సమంత. అవి అంతగా ఆకట్టుకోకపోయినా అభిమానులు మాత్రం ఆమెకు బ్రహ్మరథం పడుతున్నారు. సినిమాలకు బ్రేక్ ఇచ్చినా.. సోషల్ మీడియా వేదికగా ఎప్పుడూ ఆమె ఫ్యాన్స్​కు అందుబాటులోనే ఉంటుంది. ఆమె వెకేషన్స్, లైఫ్ స్టైల్​కి సంబంధించిన దాదాపు అన్ని మూమెంట్స్​ను సోషల్ మీడియాలో షేర్ చేస్తూ అభిమానులను మాయ చేస్తుంది ఈ బ్యూటీ.

టాప్​ 2, 3లో భగవంత్ కేసరి హీరోయిన్​లు నిలిచారు. టాప్​ 2లో సీనియర్ హీరోయిన్ కాజల్ అగర్వాల్ నిలవగా.. టాప్​ 3లో యంగ్ జనరేషన్ హీరోయిన్ శ్రీలీల కొట్టేసింది. వీరిద్దరూ కలిసి నటించిన భగవంత్ కేసరి మంచి టాక్​నే సంపాదించుకుంది. తల్లి అయిన తర్వాత ప్రేక్షకులకు దూరమైన కాజల్ ఈ సినిమాతో మళ్లీ దగ్గరైంది. శ్రీలీల మాత్రం వరుస ఆఫర్లతో టాలీవుడ్​ ప్రేక్షకులను ఉర్రూతలూగిస్తుంది. సూపర్ స్టార్​ మహేశ్ బాబుతో కలిసి ఈ సంక్రాంతికి వచ్చేస్తుంది.

నాలుగో స్థానంలో స్టార్ హీరోయిన్ అనుష్క శెట్టి నిలిచింది. ఈ భామ సినిమాలు తక్కువే. సోషల్ మీడియాలో ఫ్యాన్స్​ని పలకరించేది తక్కువే. అయినా సరే ఆమెకు అభిమానులు గుండెల్లో గూడు కట్టేసుకున్నారు. ఈ సంవత్సరం మిస్​ శెట్టి మిస్టర్ పోలిశెట్టి సినిమాలో కనిపించేసరికి అభిమానులు పండుగ చేసుకున్నారు. రష్మిక ఆర్మాక్స్ లిస్ట్​లో ఐదో స్థానాన్ని దక్కించుకుంది. యానిమల్ సినిమాతో 2023లో భారీ హిట్​ కొట్టేసింది రష్మిక. ఈ సినిమాతో అటు టాలీవుడ్, బాలీవుడ్​లోనూ ఆమె పేరు మార్మోమ్రోగిపోయింది.

సినిమాలే చేయకపోయినా సాయిపల్లవి ఆరవ స్థానంలో నిలిచింది. మరోసారి నాగచైతన్యతో కలిసి ప్రేక్షకుల ముందుకు వచ్చేందుకు సిద్ధమవుతుంది. తండేల్ సినిమాలో బుజ్జితల్లిగా మరో హిట్​ను తన ఖాతాలో వేసుకునే ప్రయత్నం చేస్తుంది. లస్ట్ స్టోరిస్ సిరీస్​తో తమన్నా చేసిన అరాచకం అంతా ఇంతా కాదు. మునుపెన్నడు లేని విధంగా కొత్తగా కనిపించిన తమన్నా 7వ స్థానంలో నిలిచింది. తెలుగులో భోళా శంకర్, జైలర్ సినిమాల్లో నటించింది. ఈ ఏడాది తన బాయ్​ఫ్రెండ్​ గురించి రివిల్ చేసి సోషల్ మీడియాలో హాట్ టాపిక్​గా మారింది.

దసరాతో బ్లాక్​బస్టర్ హిట్​ కొట్టిన కీర్తి సురేశ్ ఆర్మాక్స్​ లిస్ట్​లో 8వ స్థానంలోనే మిగిలిపోయింది. తొమ్మిదో స్థానంలో పూజా హెగ్డే నిలవగా.. సలార్ హీరోయిన్ శృతిహాసన్ మాత్రం.. సినిమాతో హిట్​ కొట్టినా సరే.. 10 స్థానంతోనే సరిపెట్టుకోవాల్సి వచ్చింది.