ఆ రూమర్స్ కు పుల్ స్టాప్.. శుభవార్త చెప్పిన దీపికా రణ్‌వీర్

Deepika Padukone : బాలీవుడ్ స్టార్ జంట దీపికా పదుకొనే(Deepika Padukone)- రణవీర్ సింగ్ (Ranveer Singh) అభిమానులకు సర్ప్రైజ్ గుడ్ న్యూస్ చెప్పారు. ఇప్పటికే ఒక కూతురికి తల్లిదండ్రులైన ఈ జంట.. ఇప్పుడు రెండో బిడ్డకు స్వాగతం పలకడానికి సిద్ధమవుతున్నారు. ఆదివారం ఉదయం సోషల్ మీడియా వేదికగా ఈ శుభవార్తను ప్రకటించారు. దీంతో అభిమానుల్లో ఆనందం వెల్లివిరిసింది. కొద్ది గంటల్లోనే ఈ వార్త దేశవ్యాప్తంగా ట్రెండ్ అయింది.

దీపికా తన అధికారిక ఇన్‌స్టాగ్రామ్ ఖాతాలో ఒక అందమైన ఫోటో షేర్ చేసింది. ఆ ఫోటోలో వారి కూతురు దువా చేతిలో ప్రెగ్నెన్సీ టెస్ట్ కిట్ పట్టుకుని కనిపించింది. అందులో పాజిటివ్ రిజల్ట్ కనిపించడంతో అభిమానులు వెంటనే ఇది రెండో గర్భధారణ ప్రకటన అని అర్థం చేసుకున్నారు. ఫోటోకు ప్రత్యేక క్యాప్షన్ లేకపోయినా, రెండు ఈవిల్ ఐ ఎమోజీలతో పోస్టు చేయడం సోషల్ మీడియాలో మరింత వైరల్ అయింది.

దీపికా - రణవీర్ జంట ఇప్పటికే 2024 సెప్టెంబర్ 8న తమ తొలి సంతానంగా కూతురు దువాకు జన్మనిచ్చారు. ఆ సమయంలో కూడా ఈ జంట అభిమానులు సోషల్ మీడియాలో పెద్ద ఎత్తున శుభాకాంక్షలు తెలిపారు. తరువాత దివాళి సందర్భంగా దువా ఫోటోలను షేర్ చేసి అభిమానులను అలరించారు. ఇప్పుడు మొదటి బిడ్డ పుట్టి దాదాపు ఏడాది పైగా గడవకముందే రెండో బిడ్డ రాబోతుందన్న వార్త మరింత ఆసక్తిని రేపుతోంది.

ఇటీవల కొన్ని ఈవెంట్లలో రణవీర్ ఒంటరిగా కనిపించగా, దీపికా ఎందుకు కనిపించడం లేదన్న చర్చలు సోషల్ మీడియాలో జరిగాయి. కొందరు అభిమానులు వారి మధ్య ఏమైనా సమస్యలున్నాయా? అంటూ సందేహాలు వ్యక్తం చేశారు. అయితే ఇప్పుడు ఆమె రెండోసారి గర్భవతి కావడంతోనే పబ్లిక్ ఈవెంట్లకు దూరంగా ఉన్నారని స్పష్టమైంది. దీంతో అన్ని రూమర్స్‌కు ఈ జంట ఒక్క పోస్టుతో చెక్ పెట్టినట్టైంది.

ప్రస్తుతం అభిమానులు, సినీ ప్రముఖులు కామెంట్ సెక్షన్‌లో శుభాకాంక్షల వర్షం కురిపిస్తున్నారు. "దువాకు చిన్న తమ్ముడు వస్తాడు", "ఈసారి పాపే వస్తుంది", "బాలీవుడ్‌లో క్యూటెస్ట్ ఫ్యామిలీ" అంటూ అభిమానులు ఆనందం వ్యక్తం చేస్తున్నారు. ఇండస్ట్రీకి చెందిన పలువురు సెలబ్రిటీలు కూడా ఈ జంటకు అభినందనలు తెలియజేస్తున్నారు.

వర్క్ ఫ్రంట్ విషయానికి వస్తే, దీపికా త్వరలో కింగ్ సినిమాలో షారుక్ ఖాన్ సరసన కనిపించనుంది. అలాగే దర్శకుడు అట్లీ తెరకెక్కిస్తున్న అల్లు అర్జున్ భారీ ప్రాజెక్ట్‌లో కూడా నటించనుంది. మరోవైపు రణవీర్ సింగ్ తన తాజా హిట్ ధురంధర్ 2 (Dhurandhar 2) విజయాన్ని ఎంజాయ్ చేస్తున్నారు. మొత్తానికి కెరీర్ పరంగా బిజీగా ఉన్న ఈ జంట, ఇప్పుడు కుటుంబ పరంగా మరో కొత్త ఆనందాన్ని ఆహ్వానించేందుకు సిద్ధమవుతోంది. అభిమానులంతా ఇప్పుడు బేబీ నెంబర్ 2 కోసం ఎదురుచూస్తున్నారు.