హోమ్

హీరోయిన్

సుబ్బి పెళ్లి ఎంకి చావుకు వచ్చినట్లు, నెపోటిజంపై సాగుతున్న ఎడతెగని చర్చ అతిలోక సుందరి కూతురుకి తలనొప్పి తెచ్చిపెడుతోంది. అసలే స్టార్ కిడ్ అయిన జాన్వీ కపూర్ గుంజన్ సక్సేనాకు ప్రమోషన్ చేసుకోలేని పరిస్థితి తలెత్తగా... ఈ సినిమా నిర్మాత, ఇండస్ట్రీలో బంధుప్రీతిని పెంచి పోషిస్తున్న కరణ్ జోహార్ ఈ చిత్రాన్ని పూర్తిగా గాలికి వదిలేయడంతో గుంజన్ సక్సేనా డైలమాలో పడిందనే చెప్పాలి.

ఇక జాన్వీ బాలీవుడ్ కెరీర్ పై ముందు నుంచీ బెంగ పెట్టుకున్న బోణీ కపూర్ తాజా పరిణామాలతో మరింత కలత చెందుతున్నాడని తెలుస్తోంది. ఎంత మంది ఎన్ని విధాలుగా జాన్వీకి బ్రేక్ ఇస్తామని ముందుకు వచ్చినా కరణ్ జోహార్ నే నమ్ముకుని కూతురి భవిష్యత్తు అతడి చేతిలో పెట్టాడు. కానీ, కరణ్ రొటీన్ కు భిన్నంగా జాన్వీతో అన్నీ మీడియం బడ్జెట్ చిత్రాలనే నిర్మించి ఆమెకు పెద్ద బ్రేక్ ఇవ్వలేకపోయాడు.

బాలీవుడ్ లో పరిణామాలు ఏమాత్రం ఆశాజనకంగా లేకపోవడంతో, బోణీ కూతురి కెరీర్ కోసం దక్షిణాది చిత్ర పరిశ్రమవైపు చూస్తున్నాడని తెలుస్తోంది. దక్షిణాదిన పెద్ద స్టార్స్ ను పట్టుకుంటే, రెండు సినిమాలకే అమ్మాయి సెటిల్ అయిపోతుందనే ఆలోచన చేస్తున్నాడట. ఏమైనా ఇదంతా జరగాలి అంటే, గుంజన్ సక్సేనాలో అమ్మడి నటనకు మంచి మార్కులు పడాలి. మరి, నిజజీవిత గాథ ఆధారంగా తెరకెక్కిన ఈ చిత్రం ప్రేక్షకులను ఏ రీతిన మెప్పిస్తుందో చూడాలి.