Click it and Unblock the Notifications
పెద్ది మూవీపై కొత్త వివాదం.. నెగెటివ్ రివ్యూకి జాన్వీ లైక్ !
మెగా పవర్ స్టార్ రామ్ చరణ్ హీరోగా, దర్శకుడు బుచ్చిబాబు సాన తెరకెక్కించిన పాన్ ఇండియా సినిమా 'పెద్ది'. ఈ సినిమా బాక్సాఫీస్ వద్ద దుమ్మురేపుతోంది. విడుదలైన తొలి రోజే ప్రపంచవ్యాప్తంగా రూ.112 కోట్లకు పైగా గ్రాస్ వసూలు చేసింది. ఈ ఏడాదిలో అత్యంత భారీ ఓపెనింగ్స్ సాధించిన సినిమాల్లో ఒకటిగా నిలిచింది. రామ్ చరణ్ కెరీర్ లో భారీ ఓపెనింగ్స్ అందుకున్న సినిమాగా పెద్ది నిలిచింది. ఇలా బాక్సాఫీస్ వద్ద దూసుకెళ్తున్న పెద్ది మరో కారణంతో సోషల్ మీడియాలో హాట్ టాపిక్గా మారింది. ముఖ్యంగా జాన్వీ కపూర్ పోషించిన అచియమ్మ పాత్రపై వస్తున్న విమర్శలు, వాటికి సంబంధించిన సోషల్ మీడియా పరిణామాలు కొత్త వివాదానికి దారితీశాయి. ఇంతకీ ఏమైందంటే?
భారీ అంచనాల మధ్య పెద్ది సినిమా విడుదలైన విషయం తెలిసిందే. అయితే.. చాలా మంది పాజిటివ్ ఇవ్వగా, కొంతమంది మాత్రం నెగిటివ్ రివ్యూలు ఇచ్చారు. ముఖ్యంగా అచియమ్మ పాత్రపై నెగిటివ్ రివ్యూ వచ్చాయి. ఇందులో కథ మొత్తం పెద్ది పాత్ర చుట్టూ తిరుగుతుంది. కానీ, హీరోయిన్ పాత్రకు తగినంత ప్రాధాన్యం దక్కలేదని కొందరు సినీ అభిమానులు అభిప్రాయపడుతున్నారు. గ్రామీణ నేపథ్యంలో సాగే కథలో హీరో ఎదుగుదల, అతని భావోద్వేగ ప్రయాణం, గ్రామ గౌరవం కోసం చేసే పోరాటం ప్రధానంగా నిలిచినప్పటికీ, అచియమ్మ పాత్రకు ప్రాధాన్యత లేదని, మరోసారి జాన్వీకి అన్యాయం జరిగిందని విమర్శలు వస్తున్నాయి.
ఈ నేపథ్యంలో ఇన్స్టాగ్రామ్లోని ఓ సినీ విశ్లేషణ పేజీ చేసిన పోస్టు వైరల్గా మారింది. ఆ పోస్టులో సినిమాలో హీరో పాత్రను బలంగా తీర్చిదిద్దగా, హీరోయిన్ పాత్రను మాత్రం పరిమిత స్థాయిలో చూపించారని విమర్శించారు. ముఖ్యంగా ఈ పోస్ట్ లో అచియమ్మ పాత్రకు సరైన ప్రాధాన్యం ఇవ్వలేదని పేర్కొన్నారు. సినిమా పెద్ద స్థాయిలో తెరకెక్కినా, హీరోయిన్ పాత్ర ప్రాముఖ్యత లేదనీ, మరోసారి జాన్వీకి అన్యాయం జరిగింది అనే కోణంలో పోస్ట్ పెట్టారు. అయితే.. ఈ పోస్టుకు జాన్వీ కపూర్ లైక్ చేయడం సోషల్ మీడియాలో పెద్ద చర్చకు దారితీసింది. ఆమె నేరుగా ఎలాంటి కామెంట్ చేయకపోయినా, ఆ పోస్టును లైక్ చేయడం ద్వారా ఆ విమర్శలతో ఏకీభవించినట్లుగా కొందరు నెటిజన్లు భావిస్తున్నారు.
ఆ పోస్ట్కు జాన్వీ కపూర్ లైక్ చేసినట్లు సోషల్ మీడియాలో స్క్రీన్షాట్లు వైరల్ కావడంతో అసలు చర్చ మొదలైంది. హీరోయిన్ స్వయంగా ఆ పోస్ట్ను లైక్ చేయడం వెనుక అర్థమేంటన్న ప్రశ్నలు నెటిజన్లలో మొదలయ్యాయి. కొందరు జాన్వీ కూడా తన పాత్రపై అసంతృప్తిగా ఉందని భావిస్తుండగా, మరికొందరు మాత్రం ఒక పోస్ట్ను లైక్ చేసినంత మాత్రాన ఆమె ఆ అభిప్రాయాలతో పూర్తిగా ఏకీభవించిందని చెప్పలేమని వాదిస్తున్నారు. ఆసక్తికర విషయం ఏమిటంటే, కొంతసేపటి తర్వాత ఆ లైక్ కనిపించకుండా పోయిందని సోషల్ మీడియాలో ప్రచారం జరిగింది. దీంతో ఈ వ్యవహారం మరింత ఆసక్తికరంగా మారింది.
మరోవైపు, ఆ వైరల్ పోస్ట్లో చేసిన కొన్ని ఆరోపణలు కూడా చర్చకు దారి తీశాయి. సినిమా పోస్ట్ ప్రొడక్షన్ దశలో కొన్ని సన్నివేశాలపై జాన్వీ అభ్యంతరాలు వ్యక్తం చేసిందని, కొన్ని షాట్లను తొలగించాలని సూచించిందని పేర్కొన్నారు. అయితే అవి ఫైనల్ కట్లో కొనసాగాయని ఆ పోస్ట్లో ప్రస్తావించారు. అయితే ఈ ఆరోపణలపై ఇప్పటివరకు జాన్వీ కపూర్ గానీ, దర్శకుడు బుచ్చిబాబు గానీ, నిర్మాతలు గానీ ఎలాంటి అధికారిక ప్రకటన చేయలేదు. అందువల్ల ఇవన్నీ ప్రస్తుతం సోషల్ మీడియాలో తిరుగుతున్న ప్రచారాలుగానే పరిగణించాల్సి ఉంటుంది.
Continue with Google