Ram Charan Upasana Konidela Net worth: రామ్‌చరణ్‌ కంటే ఉపాసననే రిచ్.. ఎన్ని వేల కోట్ల ఆస్తులో తెలుసా?

Ram Charan - Upasana Konidela Net worth: మెగాస్టార్ చిరంజీవి ఇంట మరోసారి పండుగ వాతావరణం నెలకొంది. మెగా పవర్‌స్టార్ రామ్ చరణ్- ఉపాసన కొణిదెలా దంపతులు కవలలకు తల్లిదండ్రులయ్యారు. శనివారం రాత్రి హైదరాబాద్‌లోని అపోలో హాస్పిటల్‌లో ఉపాసన ఒక మగ శిశువుకు, ఒక ఆడ శిశువుకు జన్మనిచ్చారు. దీంతో కొణిదెల, కామినేని కుటుంబాల్లో ఆనందోత్సాహాలు వెల్లివిరిశాయి. ఇప్పటికే రెండేళ్ల కుమార్తె క్లిన్ కారా ఉన్న ఈ దంపతులకు ఇప్పుడు కవలల రాకతో కుటుంబం ఐదుగురితో నిండిపోయింది. ఈ శుభవార్తతో మెగా అభిమానులు 'డబుల్ జాయ్' అంటూ సంబరాలు చేసుకుంటున్నారు.ఈ నేపథ్యంలో రామ్ చరణ్ - ఉపాసన దంపతుల నెట్ వర్త్, ఆస్తులు, సక్సెస్ జర్నీపై మరోసారి సోషల్ మీడియాలో చర్చ నడుస్తోంది.

సినీ కెరీర్ విషయానికి వస్తే, రామ్ చరణ్ టాలీవుడ్‌లోనే కాదు, గ్లోబల్ లెవెల్‌లో గుర్తింపు పొందిన స్టార్. RRR, మగధీర, రంగస్థలం వంటి బ్లాక్‌బస్టర్ చిత్రాలు ఆయనను దేశవ్యాప్తంగా స్టార్‌గా నిలబెట్టాయి. ప్రస్తుతం ఆయన నటిస్తున్న లేటెస్ట్ మూవీ పెద్ది పై భారీ అంచనాలు ఉన్నాయి. ట్రేడ్ వర్గాల అంచనాల ప్రకారం, రామ్ చరణ్ ఒక్కో సినిమాకు రూ.70-100 కోట్ల వరకు పారితోషికం తీసుకుంటున్నారని సమాచారం. సినిమాలు, బ్రాండ్ ఎండోర్స్‌మెంట్లు, ప్రొడక్షన్ కంపెనీలు, ఇతర పెట్టుబడుల ద్వారా ఆయన వ్యక్తిగత నికర ఆస్తి సుమారు రూ.1300-1400 కోట్ల మధ్య ఉందని అంచనా.

ఇక ఉపాసన విషయానికి వస్తే, ఆమె కేవలం మెగాస్టార్ చిరంజీవి కోడలు, రామ్ చరణ్ భార్య మాత్రమే కాదు. కార్పొరేట్, హెల్త్‌కేర్, సేవా రంగాల్లో ఆమెకంటూ ప్రత్యేక గుర్తింపు ఉంది. ఉపాసన ప్రస్తుతం ఫ్యామిలీ హెల్త్ ప్లాన్ ఇన్సూరెన్స్ టీపీఏ లిమిటెడ్ (FHPL) మేనేజింగ్ డైరెక్టర్‌గా వ్యవహరిస్తున్నారు. అలాగే అపోలో హాస్పిటల్స్ సీఎస్ఆర్ (CSR) విభాగమైన అపోలో ఫౌండేషన్ (Apollo Foundation)కు వైస్ చైర్‌పర్సన్‌గా సేవలందిస్తున్నారు. 'UR.Life' అనే డిజిటల్ హెల్త్ అండ్ వెల్‌నెస్ ప్లాట్‌ఫామ్‌ను ప్రారంభించి, మానసిక ఆరోగ్యం, ప్రివెంటివ్ కేర్‌పై ప్రత్యేకంగా పని చేస్తున్నారు.

ఉపాసన కుటుంబ నేపథ్యం కూడా దేశంలోనే అత్యంత బలమైన వ్యాపార వారసత్వంగా గుర్తింపు పొందింది. ఆమె తాత డా. ప్రతాప్ సి. రెడ్డి స్థాపించిన అపోలో హాస్పిటల్స్ గ్రూప్ విలువ సుమారు రూ.77,000 కోట్లుగా అంచనా. ఇటీవల ఓ ఇంటర్వ్యూలో ఈ అంశం ప్రస్తావనకు రావడంతో, ఉపాసన రామ్ చరణ్, చిరంజీవి కంటే ఎక్కువ సంపన్నురాలనే చర్చ సోషల్ మీడియాలో వైరల్‌గా మారింది. ట్రేడ్ అంచనాల ప్రకారం, ఉపాసన వ్యక్తిగత నికర ఆస్తి రూ.800-1300 కోట్ల మధ్య ఉండవచ్చని సమాచారం.

ఈ పవర్ కపుల్ జీవనశైలి కూడా వారి స్థాయిని ప్రతిబింబిస్తుంది. హైదరాబాద్ జూబ్లీహిల్స్‌లోని సుమారు 25 వేల చదరపు అడుగుల విలాసవంతమైన నివాసం, ఖరీదైన లగ్జరీ కార్లు, ప్రైవేట్ జెట్ వంటి ఆస్తులు వారి పోర్ట్‌ఫోలియోలో ఉన్నాయి. మొత్తం మీద రామ్ చరణ్ -ఉపాసన కలిపి నికర ఆస్తి 2026 నాటికి రూ.2500 కోట్లకు పైగా ఉంటుందని అంచనా. ఇలా రామ్ చరణ్ - ఉపాసన దంపతులు, దేశంలోనే అత్యంత ప్రభావవంతమైన సెలబ్రిటీ పవర్ కపుల్స్‌లో ఒకటిగా నిలుస్తున్నారు. కవల పిల్లలకు జన్మ ఇచ్చిన వేళ మెగా అభిమానులు ఈ కుటుంబానికి శుభాకాంక్షలు తెలుపుతూ, సంతోషం వ్యక్తం చేస్తున్నారు.